قصيدة ( هاض ما بي )
الشاعر : سالم محمد الجمري

هاض ما بي من تعذّابي=من دهايا الحب ومكوره
فر قلبي فر دولابي=وانزعج قلبي من شعوره
وارتجف وانهدّت اعصابي=واحتسيت الويل والبوره
والغذا والشرب ما طابي=أشربه واطعم له مروره
محتزن والدمع سكابّي=فوق خدّي تذرف عبوره
من مصابٍ بالحشا غابي=لاعب بي لعبة الكوره
شط بي منسوع الارقابي=لي على لون القمر نوره
بو خديدٍ فيه جلبابي=مثل فوع الورد وزهوره
والشفايا ذّبل عذابي=والصدر تاضي به نحوره
يشتكي من ثقل لحيابي=معتزل ردفه عن خصوره
هو حياتي وهو إحبابي=وهوه سنّوتي عند الدوره
يا نداما منّه اسبابي=مشتقي وآدوّره دوره
هوب من حولي وقرّابي=ساكنٍ عنّي المعموره
دايمٍ عيني له ترابي=لوّل يجيني وانا ازوره
وابتعد وتغلّق البابي=وصلته عسره ومخطوره
ش الفكر يا جملة اصحابي=وين منكم لي له قدوره
يسعد المايوع ويعابي=للوليع ويفتح السوره
يدرس المعنى بالعرابي=يفهم التسجيل وسطوره
أعني محمد من أحزابي=لي يعرف الحب دستوره
له هبوب الكوس لوّابي=يجلب السحّاب ومطوره
له بفسّر سدّي الغابي=كاد يسعدني بعد شوره
نجمةٍ في حدود لغيابي= وارنبٍ في البر مخبوره
حرف دال ولام بحسابي= قط ما مثله بعد جوره
والف صلّوا عد ما جابي=بلبلٍ يهتف على وكوره
ع النبي وآله والاصحابي=لي نحج البيت ونزوره


قصيدة ( حي قولك )
رد الشاعر : محمد الكوس

حي قولك حي لكتابي=مرحبا بالنظم وسطوره
أو عدد ما ناظ سحّابي=أو عدد ما لفحة عطوره
حي هذا النظم واعرابي=بو غنيم ارسلت منشوره
تشتكي من جاهلٍ رابي=لي سكن في وسط معموره
قمت افكّر فيه واوبي=واركب المزمل على طوره
بت ادوّر نجم لغيابي=وارنبٍ جافل وش فسوره
حرف دال ولام خادبي=لي بغيت افسّر السوره
ويا الآخو إنته بي ادرى بي=مشتجي والنفس معثوره
مبتلي قبلك وعايبي=خضت لج الحب وبحوره
إبتليت بروح نصّابي=غيد ماله في الملا جوره
شطّني حبّه وساهابي=ذا وخلاّني شرى الصوره
كم هجرني كم سوّى بي=كم سقاني لاعج مروره
مول ما رجّع ولا ثابي=ظالمٍ ما اسملت من جوره
ما نفعت بي طب واطبابي=والطلاسم ما خلفت شوره
هالزمان الحب نهّابي=والبخت طوّل بي قصوره
صاحبي من زد الاصحابي=عنك ياخي ما ألقط الدوره
جاك عدّي، دوك لكتابي=والعفو واسمح لي قصوره
كان صبت تراني معابي=وان خطيت ارجوك معذوره
تمّت وصلّوا يا عرّابي=عد وبلٍ تدفق مطوره
ع النبي لي ياب لكتابي=شافعي في الصحف منشوره