هاض ما بي والخلايج ذاهلين=بت مما هيس مصدوع غبين
خذت اجيس الليل من فرقا اصدقاي=لي بسلطان الحشا لي نازلين
نازلين في مغاليج الضمير =دونهم ماذال بالنوم النظير
آه يا من بايت جفنه سهير=مستخل من افراق الغاليين
مستخل ولاحد عني درى=جيف م الضيجات حاربت الكرى
كم وكم دمعي على خدي جرى=كم صفقت الراح وأرضفت الونين
أرضف الونات والعي من نزل=في حشاي وفيه ما اعتاض البدل
خذ قميص القلب وانساني لهل =ماشغبني دون حب له ضنين
هو ضنين القلب واهوه لي محب =اشتبك بالروح حبه وانتشب
صاحب في العهد ما خان وكذب=ماسمع فيه كلام العاذلين
م العواذل ما تسمع لاحشاه=لاسمع فيه ولا اسمع من شناه
كل يوم يزيد في قلبي غلاه=سيدي وادراه مدارة البنين
يانيه حبه على طلبة هواي=أحور العينين هو غاية مناي
اهوه ادوايه إلى تعسر ادواي=مغرم ما طيج هيره ساعتين
ساعة ما يوز من دونه حشا=اعفر الأطراف مجلود الحشا
له يلين القلب لي منه مشى=من يشوفه غصب له قلبه يلين
لان قلبي في وداد له وير=مهجتي وآزمت له عبد الأمر
لو ايطاوعني فلا والله ظهر=من مقره خايف م الحاسدين
م الحسود ادراه واعيون الرجيب=واحسد من نظرته أهل وجريب
مغرم لي ذجر في قلبي يطيب=خاطري وان يهد خلاني حزين
احتزن لي يهد واضحي لي صحا=فيه مابسمع عذول وانصحا
ويش يسوى نظرته عندي ضحا=أقرن الحيات مزيون الجبين
بوجبين فاق عن لون البدر=لي زها بالنور في نصف الشهر
والعجب لي من اتلبس وافتخر =في عداله تستحير الناظرين
لانظر مثله ولايوصف شراه=ييت في وصفه وحيرني غواه
هو وعل باقول لوظبي الفلاه=أو مهاة مالها وصف وثنين
هو خشف لو سولعي لو هو بشر=هو دماني لو أهو بزغة قمر
لو أهو عن خازن الجنة نفر=حراني ياصاح بو لون حسين
الحسن ثر يوم ربك جسمه=النصف للخلق والنصف اسهمه
ناذر من جان ربي سلمه=سيدي لاصوم وانشر رايتين
بنشر الرايات ان صح وسلم=من ثجيل العوق وازياد الألم
ليت عوقه يانديمي ينجسم=عن شفاه الروح باشل اسهمين
باحمل سهمين لو بيدي حول=عن فريد الزين لي ما له مثل
آه واعزاه من فرغ ونحل=وان سفر م الحال في ساعة وحين
حنت مما بي وبي ضاق الفضا=والجسم مني على نار الغضا
ياحليف العهد من دهر مضى=لك فضيت اسرار مضمون الجنين
جان يدري في ملازيم الربع=ثيبني بالرد واعيل بالسرع
غيث صب غرج في الحب وطبع=مالجي له قط من دونه عوين
عنك ما خفيت شي حيث لن=مجعلنك لي اذخيره في الزمن
صاحب ما ثاب في وقت المحن=ذاك ماينعد في طول السنين
سن بين الناس مردود المثل =جان ماخبرت خذ مني مثل
والف صلى الله علي خير الرسل=والصحب والآل ثم التابعين