قصيدة ( مدرج طايح )
الشاعر : سالم بن محمد الجمري

آه يا من عوج افواده=واستصاب وشط به خله
مدرج طايح على اوساده=ضايع ماله من ايشله
والهير فوق امرضه زاده=من مصابه صابته عله
عايف مشروبه و زاده=محرض ما حد يفطن له
الهوى لي سبب ايهاده=والغرام أضني به وتله
مولع وايردد انشاده=في هوى بو يادل فله
بو حواجب سمر منقاده=واللواحظ دعج أمثله
والصدر زمنه انهاده=حمر كالتفاح مشهله
لي مشى ع الأرض بالتاده=إجدمه توحه على حله
غرنجي سيد أسياده=لامثل له لو بمثل له
شبه لون البدر بحياده=كالقمر لي عازل ظله
خشف ريم شارد اشراده=فز يافل من امجيل له
متعب صياده وباده=يا ندامي كيف باختل له
كيف باصيده مع أرقاد=كيف انا اقدر اتغفل له
ليت من شوبج له وصاده=والتيا به روحه وشله
فاز به عن قول حساده=في محل ما حد يدله
جان حصل مطلب امراده=واستغاث وشرب من نله
واستراح ابشوف وداده=عاش به هذا الدهر كله
بن ازنيد آحيد لك عاده=لي بيشكي لك تمثل له
تسعده ويحصل امراده=من افكارك لي بها ادله
ثيبني يا ذروة امجاده=شوفني عاشق ومتوله
دلني بالراي واسعاده=يانديبي كيف بعمل له


قصيدة ( مزن غيم )
رد الشاعر : محمد بن ثاني بن زنيد

حي من قلدني اسناده=بالعبا قصده أعجل له
مرحباً به عد رعاده=مزن غيم ودقه ايهله
مرسل لي لولو انشاده=فيه متحفظ عن الزلة
عارفني أني استاده=كيف ما يبغي أفصل له
يشتكي لي كثرة اسهاده=والعنا اللي صابه وخله
والهوى يا صاح معناده=من بلي به لازم ايذله
هون الله كل ماجاده=من جدا مضنونه وخله
بن محمد مغرمك هاده=قوي عزمك له ولا أتمله
كاد يتنازل عن اصعاده=وانت له خاتل وواع له
وين ياوي كون رصاده=جان تظفر به على خله
اصبر اصبر واكتم اسداده=يعل ضدك يجتله غله
ومن تجلد بالصبر فاده=كل شي صعب يسهل له
ومن فضي سره مع اضداده=غيروا دربه عن ايدله
كن ثجيل وعاذلك عاده=وابتعد عن قوله لمجله
شف غرام الحب من راده=يستوي له حيد ويشله
والذي يعيز عن اشداده=يانديمي يتركه قل له
وجان هذا الحسن وجاده=فيه لا تفضيه للمله
جل من خصه من اعباده=بالجمال وفرع كمل له
لا عجب إن سيد اسياده=بالحسن لوما لبس دله
الفجر من نوره ازياده=يقتبس والبدر راض له
بعد ذا بنشدك وش شاده=لب قلبك لا اتحف له
لاتخلي قفل وارفاده=فوق بابه وانت مصغ له
والظبي من ييد صياده=لي نفر هيهات يحصل له
وانت خلك بالعمر فاده=في رضاه اموالك إبذل له