يا مرحبا يا معني خط الاقلامي=مثايل شوقتني في معانيها
حي المثايل يا سلالة نسل الكرامي=يا من بيوته عن الزلات يحميها
من داثر الوقت هذا طبع الايامي=مرات تصفي ومرات الكدر فيها
كم وارد ضامي وصدر بالحيامي=وكم وارد شرب من صافي مغانيها
لا تنظر اللي مضى وتعد الايامي=ارعى ربيع الزمان أول لياليها
حلو الليالي تعوض مر الايامي=مايحسب الوقت ويفكر بماضيها
لو كان ما بي كتبته جفت أقلامي=من حرتي أبدع أمثالي وغنيها
رادار فكري يصور لي مضى زامي=في حندس الليل يوم ارتاح غافيها
يوم الخلايا تنام وفكرها نامي=حرام عيني لذيذ النوم يغفيها
حالي كما عشب صيف صابه الظامي=والا كما وردة جفت نواديها
نار الغضا وتواقد في بحر طامي=خالد – وعيا مولعها يطفيها
ريم رعى في الفياض وزهر الاوسامي=قايد خشوف الوازي في مفاليها
بأرض المحيله ولو توطا لها اقدامي=تزهي وتضحك لها الدنيا وتحييها
سود الليالي مع صلفات الايامي=ناخذ مجادمها ونترك تواليها
نمشي على درب ما تطاه الاقدامي=وان وعرت الأرض يعجبني المشي فيها
يا خوي أنا ريت رويان وهو ظامي=هل كيف عطشان في ياري سواقيها ؟
ريح ضميرك ولو هايم به هيامي=حق على اللي جرح نفسك يداويها
يا مفطر الوقت هذا شهر لصيامي=ترى ليلة القدر في أخر لياليها
يا زين هد الوحش في بعض الايامي=في ديرة جفرة عسره مضاويها
اشقر طويل المعنق يبر لعظامي=صوايده من فنادي الصيد يدميها
يا شيخ هذا زمان كله انعامي=الذيب جايع وشبعانه حصانيها
لو كان يبغي يغزر نابه الدامي=هل كيف تكسر جوارحها ضواريها ؟
كل مخلوق على الدنيا فلا دامي=لابد تنهي مغازلها مطاويها
وآخر كلامي بحرف السين واللامي=والميم والعين تتلاها قوافيها