قصيدة ( قم يا نديبي فوق بنز امنقاي )
الشاعره : فتاة الشارقة


قم يا نديبي فوق بنز امنقاي = اسرع من اطيور القنص في مسيره
واختص أو راشد ابمكتوب شكواي = وقل له ترى الموجوع عينه سهيره
شيخ فهيم الرأي بالمجد مسماي = من زد خلق الله أنا بستشيره
لي من جفاك الخل يا شيخ ش الرأي = تنساه والا تسمعه بالبصيره
أنا اشتكي لله واهديك شكواي = ما بي من اصروف الدهر من قصيره
بي من وداده باطن اليوف مخفاي = وحبه علي قلبي تزايد سعيره
انا دريك الحال من عظم بلواي = ويهل دمعي ما يوني قطيره
أخفي العبرات عن كل وشاي = وأقول جاد الخل يلفي بشيره
لا هاتف منه ولا طارش ياي = ولا نظرة تشفي جروحي الخطيره
هذا مقالي وانتظر رد شكواي = واترى المولّع ما يغضي نظيره





قصيدة ( الانسان ما يترك خوي العشيره )
رد الشاعر : الشيخ محمد بن راشد آل مكتوم

يا مرحبا بالقول يللي امعناي = ولي خصني من زد ناس كثيره
خط لفاني بالتماثيل مملاي = أخن من زهر الورود وعبيره
واحلا بعد من كل شي منقاي = ومن كل شيء طيب تستخيره
يا مرحبا لك عد ما سار خطاي = واعداد وبل جارح الأرض سيره
لي عاد حالك كالقلم صار مبراي = ومن صاحبك قلبك تزايد فريره
ودموع عينك تسكب الدمع كالماي = ودايم عليه امن الوله فيك غيره
ان سلتني يا زين مني لك الراي = والانسان ما يترك خوي العشيره
لا تستمع أقوال حاسد ووشاي = أهل النمايم ضايعين البصيره
ال وخلك للهوى صار نساي = عسن درب تتبعه فيه خيره
وأنا بعد عطشان وادوّر الماي = في مقطعه واتبع ضحيح الظهيره
يسري بقلبي عارج الشوق سراي = لي كنت في ديره وخلك ابديره
وعزي لمن مثلي من الحب مبلاي = وقبلي على نار الغضا في سعيره
وتلعب بي افكار الهوى دون جدواي = محمل غرامي تايه في مسيره
يحدني في بندر غير مرساي = جزيرة فيها هوامش خطيره
مملوح في زينه له الخد مدماي = رفيع في شانه ونفسه اصغيره
شعره على لمتان ما ياك مطواي = كما ذيل شقرا في مهب المغيره
ويا بن خليفه وانت يا زد خوياي = فدني برايك والنظر والبصيره
قانون للعشاق دستور مسماي = الا اعتمادي ما قبلها وزيره
الدمع من عيني على الخد جراي = يوم امسحه مثل البحر في طفيره
النار يا مشكاي في الجوف واعضاي = وش حيلتي يا عزوتي والذخيره





قصيدة ( حي الكتاب أومن امعنيه جداوي )
رد الشاعره : فتاة الخليج

حي الكتاب أومن امعنيه جداوي = منهوب يشكي ما يكنه ضميره
يا : بالبيان اموضح الخط مقراي = در القوافي من بحور غزيره
قول تناولته امرحب ابيمناي = فيه الصفوه لي وكل البريره
الذ من در البكار المصفاي = بالقند والريح المخلط عبيره
زادتني الشكوى على زود بلواي = وانهل دمعي من عيوني نثيره
توقي وذوقي له وشوقي ونجواي = شوق المدوي يوم وافى نشيره
يتلون وسمي الحيا وين مطراي = ولهم مفالي منبت العشب ديره
شجيت لي يا مسندي حال مظماي = وانته على شط مروض غديره
هل كيف يشكو من على منهل الماي = ينزف ولا ينقص من الماي بيره
عطشان والوادي من الري مملاي = شف كيف حالات الهوى بك خطيره
يا مرحبا باللي يدور من اخواي = رد يهون من ضميره زفيره
مني يجيك العون يا ذخر عيناي = منجود مني بالفهم والبصيره
يا شيخ ما نستهون القصد في الراي = الدرب موحش والمهمه كبيره
جانه وعدنا صاحبك بالرضا جاي = نفديه وان شفنا عن الراي غيره
بانمسكه مسك القبيض لمقافاي = بالغصب لو دونه سبور كثيره
بو يادل ضافي به القد مكساي = يثل على متنه يتله حديره
وعيونها عين ابرق الريش مدعاي = والعنق من وصف الخشوف المذيره
مياس عوده باللحم هوب مسداي = قامة هيوف من صباها نزيره
شانه كبير أو عند لاشراف مسماي = واترى الخياره في النفوس الصغيره
عسى قصوري بالرضا منك ممحاي = ان شفت مني يا مودي قصيره





قصيدة ( حي الكتاب اللي جدانا معناي )
رد الشاعر : ابو شهاب

حي الكتاب اللي جدانا معناي = اللي موجه من كبير العشيره
من بالمراجل والمروات مسماي = شيخ نعده للنوايب ذخيره
يا مرحب ابقول كما الدر منقاي = دانات عقده من ابحور غزيره
قول مضامينه حوى جيد الراي = به جاد بو راشد من أقصى ضميره
هب أو سند في الحب راكب أو مشاي = يوم العرب بافكارها مستديره
اوفي أو زاد أو ضاعف الرد مثناي = شيخ يرى الاشيا بعين البصيره
واسى به افواد من الوجد مملاي = واطفى الحرايج من لوافح زفيره
أقرأ وأنا معجب بالأبيات ويلاي = أشوف ركب الشعر صوبي مسيره
يا حي بللي سند الجيل جدواي = جيل شرات الزهر نفحة عبيره
أغلاه من الدانات في كف شراي = كل بيت يسوى فوق مليار ليره
أوحى بها قلب من الحب مبلاي = واملت قوافيها لواعج مثيره
عجيب مثلك يشتكي ندرة الماي = والأرض فيحاء والمناهل وفيره
غدرانها فياضة الري ملاي = ما تشتكي كثر النزف من قصيره
شوق حدابك تسكب ادموعك افلاي = على اوجناتك ما يوني خريره
في شف من يفدى ابماشي ومطاي = وجرد المذاكي ولا موال الكثيره
حر بجلباب المحاسن مغطاي = جز أو رمى قلبك إبيت نظيره
واصبحت به هايم امعنا امشقاي = مطلبك منه هوب مطلبك غيره
خل الأمر بينك وبينه مخفاي = وأخذه ابطيب أو لين بتنال خيره
ما حد من كيد الخوندات معفاي = غير الذي بالفعل ميت ضميره
والا نحن وياك نشدو على الناي = ونعزف على نفس اللحن والوتيره