قصيدة ( الهـديـه )
الشاعره : فتاة الخليج


الهديه يتني أصدافي = هوب لي من أول آحيده
يا زعيم الفكر يالوافي = فيك معنى العرف تفريده
والفهم من نبعك الصافي = والأدب فنه وتجويده
همت بين اعصار عسافي = في شموخ إجبال امشيده
لا ذرى عندي ولا اتقاني = في النزول أوعسر تصعيده
بين موي ابحور ملقافي = ما يصك القوع بليده
ذاك لي خلاني امجافي = في احتراس وفكري آعيده
ما نولفها من الطافي = لي على المزبون تقليده
من نضار أوتبر شفافي = كم خشف زان به جيده
تهت بين اشعار عرافي = في بيان السبت تحديده
كل منهم خايعه عافي = ما يدوس الرسم تسنيده
يا محبي عوج لانجافي = وانتهل صافي مواريده
إن صفا لك منهل صافي = من منالك في تود يده
عود له والعود لانصافي = والحقه لو داره ابعيده
لا تشيل اهموم واحسافي = كلها من غيرك ازهيده
يا هوى الخفرات يا سنافي = اشقر ينب عن الصيده
وين شيل الشربت ألحافي = والرهام أو ناعم الميده





قصيدة ( رمز التحيه )
رد الشاعر : الشيخ محمد بن راشد آل مكتوم


هلا بللي معنن لي تحيه = هلا عد النسانيس العذيه
هلا به عد ما غنى البلابل = على لغصان بالحان شذيه
عدد ما يقضي الواجب شغول = شغيل في مشاغيل الوفيه
عدد ما تلعي الولف الخلايا = وما رحب حبيب وقال حيه
وما خبت على البيداء ركايب = وما حنت على المورد مطيه
وما هبت نسانيس الذواري = لفا من صوبكم نسناس فيه
لفا من صوبكم مرسول كاعب = جدانا مرحبا مليون حيه
جواب من جداكم نفتخر به = ملاذ الملتجين اهل الحميه
وانا من حب خلاني معذب = معذب دايم روحي شجيه
نصحت القلب من تبعه نهيته = ولكن المحبه عاطفيه
تآثير لها في القلب فاعل = كما سم الافاعي اللاسعيه
الا يا عاذ لي بالله خفف = اذا روحك من محبك خليه
وكيف اصبر على لفراق دامت = ونار الشوق تتلاظى لظيه
تنايت بي ريادي البين دونه = وصبري بالتسلي واللهيه
غزال يتعب القنيص دونه = رساة الريم والعين أو حشيه
كأن الليل يبرى في ركونه = ولو ليل الدجى بانت سنيه
وميدول تحدر عن متونه = شعر شقراء من الخيل اذهبيه
اذا نعطي مقال الشعر جده = يزيد الشوق في نفس خليه
وهبنا للقريض وسام عارف = لها تاج المقال امر شحيّه
دساتير البحور الها قوافي = مراسيم وكانت أقدميه
حسين من تطابيعه سلوكه = زعيم كنها قايد سريه
سلامي بالوفا ياهل الوفايا = بممزوج السلام ازكى تحيه





قصيدة ( تحية شكر على وسام الشعر )
الشاعره : فتاة الخليج


هلا بالجيل لي ياني هديه = موجه في الخطوط الأسلكيه
هلا باللي معنن لي مقاله = وانا له في الرجاء ما دمت حيه
هلا به عدما سحب تراكم = وهلت من حقوقه موسميه
وعد اما سقى الوسمي وسالت = به الوديان في البطحا الوطيه
وجلباب الحيا لف الروابي = كساها بالمروج الأزهريه
وشكلها ورود من بنفسج = وحمر واقحوان أو سندسيه
ويا هلا عد ما نجم سرى به = عجيد القوم وان قاد السريه
وعد اما شدى الجمري وغنى = حمام من اقفاع أو قنطريه
وما هبت من الجبله نسايم = اتداورها جنوب أو مطلعيه
هلا بللي جلا عني همومي = لكنه نقض اجروح طريه
أجل اما حوت لافهام عندي = واشرف من تشرف في البريه
لفاني كل هاتف به يخبر = وباشرته مرحب يا خويه
تناولته وانا بارض العباده = ولولا النسك حلينا القضيه
تشاكيني وعندي فوق ما بك = وهذا الحب والشكوى بليه
قضايا المولعين الها مزايا = اتعالج بالأساليب الخفيه
فلا فيها عذول أو لا مبذر = ولا مبدي سدود داخليه
حلاها يوم جفن الواش غافي = وثاري الخل بالذاري عفيه
فلا كني أشيد بالمحبه = إذا كانت روابطها قويه
فهذا الشان من طبع الليالي = ولو ترويك شطتها رخيه
عساها كل ما طال التنائي = بها تدني لياليك البهيه
تهون ولو تناهت بالعظايم = تدوس الوعر فيها والسويه
فلا ينلام من صابه مصوب = سهام من عيون بابليه
تفل المشرفيات القواطع = ايلي هز الرماح السمهريه
برز سحر المفاتن في عيونه = ونادى من يبارز بالحديه
فلاكن الشجاع اللي امجرب = تصرعه المباسم والدعيه
وقد بالصبا والحسن تايه = تهضعه النسيم ان يت جذيه
وفرع فاحم كالليل داجي = على لرداف منشول الحضيه
ووصف كامل بالزين حده = وخلق في سلوكه جاذبيه
تسل الروح من جسم المتيم = وتدعيها فريسه للمنيه
كذا حال المولع في ظروفه = رميه اتخطي واتصيبه وميه
ولا تبقا من الشّيّين حاله = فذلك في المغامر واقعيه
رعاك الله يا مندوب مني = ابمضمون المثايل والتحيه
اتيمم بوجسيم أو خص قومه = محمد لا خلت منه الرعيه
وقل له يا ذرى من يحتمي به = تسلمنا المواهب لشرفيه
فخور بالوسام اللي هديته = وفخري بك على هذا رقيه
اذا انت لي على هذا امصدق = فللترشيح عندي معنويه
لكم باقدم أوارق اعتمادي = على آني مخلص في كل نيه
فلست ابمن يباهي في مقاله = ولا من يدّعي بالعبقريه
فلاكني بحوري في المعاني = غميجه والمواهب ألمعيه
افرز من مخاميلي فروطه = فروط اليك وانقى الجوهريه
فللتاخير لي يا شيخ حجه = جليه هوب من ذاتي بغيه
أسباب الصوادف حيرتني = وانته لي تعرف الحق فيه
وكم لك نطلب الله في دعانا = ايمدك بالمواهيب القويه
وفي ختم المقال اهدي سلامي = على المرسول شفاع البريه
وصحبه عد ما قول جدانا = موجّه في الخطوط الأسلكيه