قصيدة ( كم أردد ونتي من ضيج ويج )
الشاعره : فتاة الخليج


كم أردد ونتي من ضيج ويج = في ضميري ما توزاه امخلوق
ونتي ونات مطعون زريج = من رهيف جس مجموع العروق
عاد وسع الفي في عينه ضويج = لا مثيب له ولا حلف رفوق
مركبي مرساي في لج غميج = بايعلي كيف يوم الولم دوق
كل شي يهون عن قطع الصديج = والقطيعه كل ما طالت عقوق
لانبأ يانا ولا علم وثيج = فيه شرح الحال عنكم يا صدوق
غير عندي في الأمل منكم بريج = والتزام العهد فيكم والوثوق
إنشغال الوقت لي سد الطريج = غير هذا يا محبي ما يعوق
لا تخلف الظن عنا يا رفيج = لك انا مرهون في كل لحقوق
التمس لرضاك عذر به حجيج = وانت بالسمحان والعليا سبوق
انظري في غير شخصك ما يليج = لا ولا لي غير ما تهواه ذوق
اشتكي وانا وسط بحري غريج = وش حياة اللي مجسي في لوهوق
لو شكيت وحس بي من في الخليج = جان سال الدمع لي من كل موق
بي من التبريح ليعات تهيج = مدمع نضحه كما نضح الصفوق
والسبايب لي دعى حالي سريج = وانتزع مني شلايا لمعلوق
لي جرحني جرح في يوفي غليج = ما يلمه رفي رفاي لفتوق
النيا بي طال وابعد بالفريج = واستحال الود بالصد الفروق
والتعتب يتعب القلب العويج = ما يزيده غير فوق الشوق شوق
كم أردد ونتي من ضيج ويج = في ضميري ما توزاه امخلوق





قصيدة ( حي من دعواه للمعنى سبيج )
رد الشاعر : الشيخ محمد بن راشد آل مكتوم


حي من دعواه للمعنى سبيج = مرحبا به عد ما ناضت بروق
اوعدد ما هب نسناس الفجيج = من شمال ومن جنوب ومن شروق
داعب الغربي عليها مستفيج = بارد النسناس م الودق امهدوق
اوعدد ما صلب الوسمي سويج = من سحاب مدنف مزنه رفوق
اوعدد من جد في ممشى الطريج = ساعي الدنيا وعلى الكون امخلوق
مرحبا يا راعي القول الحجيج = لي تعمق في شرايين العروق
شاقني معناه والمعنى شويج = شاعر مخلص ودايم لي صدوق
يكسب الدانات من لج عميج = وين ما تريل حصاة الغيص فوق
له مع الأيام تاريخ بهيج = أسفرت له شمس من باهي شروق
هيض احساس الوليع اللي شفيج = حرك الأغصان واهتزت وروق
انشغال الوقت ميسد الطريج = ومنهج العشاق أبوابه طلوق
الهوى يشبه لشرطان النسيج = بين غزال اوبريم ومغلوق
لو يغيب بعيد يبعد هو صديج = والذهب ما تغيره أسواق سوق
حص م الياقوت والعطر العتيج = ومن خزاين كل غالي ومعشوق
يدرك الغايات ذو العزم الوثيج = ومن تعلا في الشوامخ صار فوق
نافل مفروز عن ضول الوسيج = له عليه حق ولي عنده حقوق
لو سرقت النوم قلبي ما يليج = مثل حر تل سباقه خفوق
زاد دقاته غريم مستهيج = به يزيد الشوق له بامراض عوق
عوق من لا صاب من قبله عويج = ذا مصاب صايب اعماق العموق
عز قلب للحبايب مستشيج = في عناه لوه مع الخلان شوق
يا صديجي ان تنوح ابصوت ويج = المحب يصيح لمحبه شفوق
تسبح العشاق في البحر الغميج = والخوالي لا تشاق ولا تشوق