قصيدة ( محبي لي زعل مني تراني )
الشاعر : الشيخ محمد بن راشد آل مكتوم


محبي لي زعل مني تراني = على عهد الصداقه لاوليه
انا ع العهد ما يفناه فاني = مدى الايام والدنيا السنيه
فلا بنسى وداده لو نساني = محبي بيننا اعهود قويه
ربيع المول عن قاصي وداني = بدلو الود يرويني ضميه
فلا تسمع كلام الموشياني = عن العذال واصحاب الوشيه
يفوق بزين ربات الجناني = فهيم بالقوافي عالميه
بديع الحسن م الخود الحساني = جميل والصداقه جوهريه
يداعبنا النسيم البرداني = هوانا بالنسانيس العذيه
ولك تقدير ما يجناه جاني = يا أهيل عصور الغرنجيه






قصيدة ( هلا حي الجواب اللي لفاني )
رد الشاعره : فتاة الخليج


هلا حي الجواب اللي لفاني = موضح بالحروف الأبجدية
ارحب عد دوراة الثواني = تراحيب بها نفسي سخيه
بمنظوم المقال وبالمعاني = ومرسول السلام وبالهديه
وبالتعبير لي لفظه كفاني = وجدد لي مواثيق قويه
مكافاته عجز عنها إلساني = ولا دري كيف بشكر يا خويه
انا لك في الزمان الأولاني = وفي التالي مراعاتي وفيه
صداقه ما يغيرها التداني = ولا لبعاد مجراها سويه
على هذا ولالي نو ثاني = يثير الصد والنيه مطيه
وعندي ما يقول الموشياني = هبا شلّه صفير العقربيه
صديج ما يسرك بلحساني = عدو ما يضرك بالأسيه
رعى الله صاحبي كيف اعتناني = وانا مالي على الهجران نيه
ولا حسبه زعل لي منك ياني = جميل وفي التفاهم معنويه
سلامي لك وشكري وامتناني = بعرفان الوفا ما دمت حيه





قصيدة ( هلا بللي صروح الشعر باني )
رد الشاعره : فتاة الخليج

هلا بللي صروح الشعر باني = يحكمها وتتعب في الرقيه
مطالعها من حروف البياني = وهل يخفى سنا الشمس المضيه
تنقا من مخاملها الجماني = كما تنقا التجار الجوهريه
أتابع بهتمام اللي لفاني = بيان السبت كود إليه عنيه
بها توجيه من رد المعاني = ليه وآباشره بللي عليه
وهذا اليوم لي فيه امتحاني = تناولته ولا ريت الدعيه
سوى التلميح فيه اللي دعاني = تخالجني تماعين قويه
سلام طاب حشوه بالتهاني = وألفاظ معانيها خفيه
كذا حال الهوى في المود ماني = حياته دوم لو يمرح شجيه
وهذا الشان من طبع الغواني = نوادر لي بهن تلقا وفيه
مواعيد لها عرقوب ثاني = تخلفهن ولا فيهن حميه
فيهن من حسين ابلا حساني = تبدل للشقي حسناه سيه
وفيهن من يحليه إتزاني = وفيهن من كسول ومن جريه
ولك فيهن من الخبره معاني = تعرف الميل من عدل السجيه
وصاف اللي صفالك في الزماني = وينب حب من تبعه قذيه
وأرفع لك مع الشكر الأماني = بهذا العام للهجره هديه
على ذري الصباوان هب عاني = أحملها العواطف لاريحيه
سلام لك وبه أسمى التهاني = أخص بها سموك والتحيه