قصيدة ( ليت عمري قبل ما اشوفك قصر )
الشاعره : زينه - زعبيل


ليت عمري قبل ما اشوفك قصر = وليتني يا خل مجدود النظير
آه من الدنيا وتحكيم القدر = لي دعتني في ودادك مستجير
لي طعنت افواد توه في الصغر = جاهل في الحب ما عنده بصير
بك تعلق يا حياتي وانجبر = وارتحل لو طال به درب المسير
لاجل حبك كم جاسيت السهر = وكم دق الشوق بالقلب الضرير
طال صبري وانقضى عني الدهر = وانتظر شوفك عسى حالك بخير
صعب يا خلي تنسيني العمر = لا تقول انساك هذا ما يصير
ما خلق قلبي من احجار وصخر = غير عوقي يا الظنا عوق خطير
لا تحملني على امابي كدر = ولا تحط اشروط خالين الضمير





قصيدة ( آه يا من ون ونات القهر )
رد الشاعر : الشيخ محمد بن راشد آل مكتوم


آه يا من ون ونات القهر = من جروح ساطيه باقصى الضمير
مستصيب وصابر طول الدهر = كاتم ما بي ولو جرحي خطير
الحذر ما يفيد وان ياك القدر = الموده تبتلي عود وصغير
ما يلام اللي عن امابه نشر = والقوافي تشبه الدر النثير
الصبر ثم الصبر ثم الصبر = ومن صبر لا بد يحمد في الأخير
يرجع المجمول لو طال السفر = وتفرح ابلقياه من عقب المسير
إنت يا غالي ويا أغلى بشر = ما نباك اتم مكفوف النظير
كيف تشكي وانت لي والي لامر = لو يكون يصير .. هذا ما يصير
بنشدك عن طير في غبة بحر = في البحر دايم وفي بره يسير
حذر ما ينصاد في لمسه خطر = يحمل اجناحين وابهن ما يطير
في بساتين على شط النهر = حذر ما ينصاد واحذر م الحذير
يعل داره يود همال المطر = ويازم الرحال يروي م الغدير
تكسي ادياره من أنواع الزهر = والشذى من البن نفحات العبير
والزمايم تغشى بانواع الشجر = وتازم الوديان مفروشه حرير
نور خده مثل شعشاع القمر = والا شمس هيفت عقب العصير
وان تبسم عن ثمان كالدرر = دانة الطواش من لج غزير
من عليه اهدي سلامي والأمر = اشتبه عنوانكم والأسم غير