قصيدة ( بن خليفه اسعفنيه بالعجل )
الشاعر : الشيخ محمد بن راشد آل مكتوم


يا نسيم البر يا شرتا الينوب = بلغ المحبوب خبري والأمل
لي عليه القلب مشتاق طروب = يشبه الآرام غزلان السهل
قايد أريام المها فالي عزوب = في الكفايف بين سيحه والرمل
إن تهايا يخجل البدر الحجوب = ويحجب الياهي بنور يشتعل
اشقر جاني على المتن الكثوب = المعثكل فوق لامتان انتشل
إنت عندي يوم غالي ومحبوب = كيف حبي من فوادك يضمحل
الهوى غلاب غالب ومغلوب = والجروح الداميه الغتم اتعمل
هل ما يجري على العمر محسوب = وفايض العبرات مني تنهمل
أنشد النسناس في وقت الغروب = في الفيا الخالي يداعبه الزجل
وارتفع في عالي الطعس الكثوب = أتعلا في الطويل ولي محل
وادعب النسمات ذعذاع الهبوب = بارد من صوبهم ريف امطل
وانشد الشرتا يلي هبت ينوب = ولا من النكبا محال أولا حول
في المحبه للصبر لازم أدوب = واجبه في معسراته يحتمل
اتحمل ها الجفا وانوح دوب = في ضميري منك رضيا والزعل
لو نظرت الجسم م الحب امعطوب = تسهر اجفاني ويرقني الملل
منك لا رحمه ولا منك هروب = يا حبيبي لا تخليني مثل
مخطر من حرة امابي أذوب = نادي العشاق لي ما ريت حل
أرجع بشكواي من له قد نوب = بن خليفه إسعفنيه بالعجل





قصيدة ( مرحبا ما هب ذعذاع الجنوب )
الشاعره : فتاة الخليج


مرحبا ما هب ذعذاع الجنوب = بارد النسناس لي صوبي حمل
يحمل الذكرى وفي القلب العطوب = الشجون أشد من ضرب الأسل
قمت اسح الدمع من جفن سكوب = كل صعب غيركم عندي سهل
حي بالمندوب من عقب الغيوب = والطروس اللي عنتني بالمثل
مرحبا به عد نسمات الهبوب = ماذرت في البوارح والشمل
مرحبا عد المدوي ما يلوب = في مقاطينه وما ساق الزمل
مرحبا ما تنتحي شمس الغروب = واشرقت في مطلع الفجر الطفل
عد يوم مر في الشهر امحسوب = عد ما تم الهلال أو ما افل
مرحبا مليون بالخل العتوب = صابكم عندي كما شهد العسل
إن اخذتوا ذاك في حق أو وجوب = وان عفيتوا للعفو انتوا أهل
يا مديني بالوفا دينك غلوب = وين بنظر كلها الدنيا أمل
الذهب ما يغيره في الوقت دوب = عن مثال الصفر شكله ينعزل
والحرير اللي على الجسم اللبوب = هوب مثل الجز لي ماله سمل
لي وداده يضمحل إلا هدوب = ليس كالمبروم في نسج أو غزل
راحتي فيكم وتعذيبي عذوب = لا ولا عنكم يعوضني بدل
في مهامة حيكم قلبي عزوب = ينتعش بالريف لي منكم حصل
إن بغيت أتوبه عيا يتوب = وان عذلته يوم راواني زعل
المحبه في القلوب إلها دروب = هوب كل وين ما يبغي وصل
لك اجدد كل يوم في الحسوب = إلولا والحب يا أعلا مثل
والتهاني لي لكم عني تنوب = والأماني رافله بابهى الحلل
عيدكم يعله يعاود يمحبوب = بالنصر والعز مع طول الأجل
والهديه لك احملها كعوب = سنها عن ست عشر ما كمل
من خشوف الريم جذاب لعوب = شارد وان خز بالنظره يفل
رب قفر ما بها غير الهبوب = مخصبه باليود ما ياها المحل
تم جيلي بالصلاه وكل نوب = السلام أخص به خير الرسل