قصيدة ( يا حسين اللون مياسي )
الشاعر : الشيخ محمد بن راشد آل مكتوم

يا حسين اللون مياسي = سيدي يا سيد الخودي
يا عجيد أريام لطعاسي = هوب سيحيات ولجودي
والعيان الدعج لنعاسي = والهدب كصف لجنودي
حبكم في القلب لساسي = والجسم ما صار في زودي
فوق هذا زاد وسواسي = صدكم يا ناعم العودي
أشهد الله أني مجاسي = وفوق هذا عندي شهودي
لا تسمع كل رماسي = واترك الواشين لحسودي
كم بنيتوا في الحشا ساسي = وصار لجلك ملك واحدودي
يا هبوب الصبح نسناسي = لي هواها ريض النودي
ذكر اللي بالهوى ناسي = صاحبي بو خصر مجلودي
لن حبه ماله قياسي = جيف ما يوفي بلعهودي
ما درى متملك احساسي = لن حبه ماخذ الزودي
ما صطالي غيركم ناسي = إنت في روياي معدودي
جوهر المرجان والماسي = زاهي من دون لعقودي
يا بدر على العين والراسي = عشر فوق الخمس معدودي
دق قلبي دق لجراسي = لي عليه الطالب ايعودي
محملي في بحركم راسي = واسمكم شامخ ومفنودي
يا شذا من كل لجناسي = مثل طيب العطر والعودي
ورد وامفتح بلجناسي = لو يطول ويزمن إيودي
كل من ازمن طاب نوماسي = هوب م لعادي ومزيودي




قصيدة ( مرحبا يا حي مياسي )
رد الشاعر : سليط

مرحبا يا حي مياسي = عد ما قد دنت ارعودي
وما كتب حبر بقرطاسي = أو عدد ما هبت النودي
تحتني في بحر غطاسي = كم سبحت وعيت اعضودي
يا نديمي كون متواسي = مالنا حد ولك احدودي
ما يجب تجرح لي احساسي = يوم بادافع عن وجودي
لو معي في الحب وسواسي = جان ما رددت منشودي
ليش دايم تتبع انحاسي = يا نسل لكرام واليودي
لا تغرك جملة الناسي = تنظر الكثره والحشودي
لو تعذلوني ما هب ناسي = صار لي كثر العذل زودي
لو تشوف الكاس نكاسي = ما يحمل قطره ولا زودي
عارفين القبضت الكاسي = كم نداراه بالهودي
ولو تشوف الحبل محتاسي = يروي العطشان بالزودي
ما انهدم لي كان متواسي = لي شرا لهرام موجودي
ينهدم قصر بلا ساسي = جان في البنيان منقودي
ما نتخبر عنهم الناسي = نبعد الشوحات والرودي
ولا نغث الراقد الناسي = عادة قول العرب هودي
ولي يسير بعزم نوماسي = ذاك ما بترده ابنودي
خفق قلبي والمسا ماسي = خفق حر شاف لهدودي
م العشا معطيه لفلاسي = يوم صقاره يبا زودي
حبهم في روح لنفاسي = في شراييني وفي عودي
مثل لي يدخلك لباسي = في عروق القلب مجلودي
كل ما بيهب نسناسي = ذكرنيه والملا ارقودي
هزف اللي قلبهم جاسي = لو شرات الصخر جلمودي
يا نسيم هيج احساسي = بالسراعه يعلك اتعودي
صوب لي يزهي بللباسي = في الغوى زايد عن الخودي
يا حلاته صوته الماسي = مثل لحن الوتر والعودي
يا نسيم البر حساسي = يوم نور الفجر عمودي
يوم كل غافل وناسي = في تلايا الليل ورقودي
ما ينام الليل لمجاسي = والهوا بري وبرودي
كم محني قلبي الجاسي = صوبكم يمشي بلا قودي
يا حسين العود مياسي = بو خصر هايف ومجلودي
ش السبب وتقول لي ناسي = يا مليح الحسن مفرودي
يا غصن ما موز لغراسي = ينسقى دور أو دخل يودي
بوهدب صفين حراسي = والمعنق عنق لعنودي
مثل لون التبر واللاسي = الشعر ضافي ومردودي
للصداقه هوب أنا ناسي = صوبكم ما بقطع اقيودي
لو أشوف الدرب منكاسي = والشعر به فاضت احدودي
بلتزم لو بقطع الياسي = والصبر راعيه محمودي
اسمح وسامح يا مياسي = والسموحه منكم اتعودي




قصيدة
رد الشاعره : المياسة - زعبيل

يا صليط في الهوى باسي = واشتكى ليعات واصدودي
صوبه بوعود مياسي = لي عيانه دعج وسودي
واستوى في الحب وسواسي = ظن خله ناوي ايعودي
لي سطا في القلب له ساسي = مورج واغصونه اتنودي
ينسقا ريان ما ناسي = نابت في وسط لعضودي
والنسيم إن ياه نسناسي = يذكره وايدد اعهودي
وذا هبوب الكوس في الماسي = صوبهم مرسول ايرودي
في نسيمه ايرد لنفاسي = لوعصف واندنت ارعودي
قلب خله سالي أو ناسي = وهو بقلبه نار ووقودي
حبهم شريان لساسي = في وريد القلب موجودي
لا اتخبر عنهم الناسي = الخفايا مالها اشهودي
يا معنا قلبكم راسي = في هوى الخفرات معدودي
مالكم حد من لجناسي = ينعرف من بين لحشودي
والعدو يسعى بلخساسي = بينكم وايزيده ابزودي
وانقطع لي كان متواسي = واصفرت ليدين من اليودي
يا صليط اتدوس لبهاسي = في الحبيب الزين لعنودي
خل ذجره وكون له ناسي = لي مضى ما ظني ايعودي
واذكره إبطيب لحساسي = ولا تصد الصوبه اترودي
إنسكب من ايك الكاسي = وانهرق لي فيه موجودي
والذي في العين والراسي = ما خفق في عالي ابنودي





قصيدة ( أنا جروحي تلفني )
رد الشاعر : الشيخ محمد بن راشد آل مكتوم

يا مرحبا من عد لشعار = وبيوت شعره شوقني
مني تراحيب لك اكبار = ويا سيدي لجلك أثني
مالومكم والحب جبار = كم في هواهن داهمني
ما يستوي زرع بلا اثمار = لي تايه من كل فني
لي ينسقا من فيض لنهار = رويان ورعوده ادني
يا زين جان ايروحك اغزار = أنا جروحي تلفني
ارضف الونات تكرار = واصيح صيحات التمني
أصفج بيمنايه عليسار = وهو يضن أني أغني
شروا غريب مبعد الدار = ولاحمام فوق فني
وانوح نوح اطيور القفار = لي في نواحي شاركني
مثل البلابل فوق لشجار = كل على فنه يغني
ماحد درابللي بهن صار = إبهن وله ولا تغني
وانوح نوح اطوير قنطار = لي يسمعه قالوا يغني
واعوي عويل الذيب لي غار = من يخطي الصيدات وني
لا تسمع اللي مالهم كار = لي مختلف ظنه وظني
تلف حياتي يبغي الثار = واصيح ويحسبني أغني
يا صاحبي لا تسمع اليار = واهل النميمه والتجني
كم واحد خلوه محتار = وسعي العواذل مايوني
خلك على الييران صبار = واصبر وخذهم بالتأني
اصبر وجاد الوقت يندار = والوقت لي ماضي يثني
لوما الهوا وطيب لشعار = ماريت للونه مغني
عيني تهل الدمع مدرار = أخفي دموعي وافضحني
يللي بحالي فاعل انكار = ظنيت ظن وخاب ظني