قصيدة ( علتي لا حول خطره يا حمد )
الشاعر : الشيخ محمد بن راشد آل مكتوم

آه انا ونيت من عوق يزيد = باخصني لي جفاني وابتعد
شط بي وادعاني مثل الوليد = حيث ما منه وصول أو لا وعد
حط لي نار من النار الوجيد = زمهرير في حشايه تتقد
أسمراني شب في عصره فريد = حاز كل الحسن حازه واستبد
أحوري للغواني صار سيد = ما على وصفه وشكله شفت حد
بو ثنايا صافيات كالجليد = وان تبسم عن ثمان كالبرد
والترايب كالسجنجل ذا إوجيد = أتلع تاه ابجماله واستبد
نابي الردفين بو خصر جليد = مالي الأطراف والقامه مدد
وان تهايا صاحبي شوفه يميد = مثل ما النشوان شخصه ينفرد
هو رشيق القد للخفرات سيد = وان تعمد بالصدود ابغير حد
هو متاع الروح هو عمري الوحيد = هو حياتي من حياته استمد
بهبهاني فذ في عصره وحيد = م اتجبر لا يسال أو لا نشد
أتسلى والتسلي ما يفيد = علتي لا حول خطره يا حمد
ما ينام لليل لي عوقه شديد = يوم كل نام وأذهل ما رقد




قصيدة ( مرحبا يا حي بالدر النضيد )
رد الشاعر : ابو شهاب

مرحبا يا حي بالدر النضيد= حي من سوق القوافي به صعد
وارتفع به عن مهازيل القصيد = فوق عن لي ينتشر واللي يعد
في جديده للشعر معنى جديد = للمثل عمده وللحكمه سند
يسند الأشعار بامثال تفيد = والقريض بلا مثل ما يعتمد
ذي مواهيب بها حد يجيد = وحد يقصر دونها لو يجتهد
فرق بين الصرح والبيت الهديد = ومن معين الحب كلنا نستمد
وان سلتني عن مياثير التليد = قلت لك بالمثل والحكمه خلد
قلت وآنا في القوافي لي رصيد = وان بديت ابراي عندي مستند
أنتشي بالشعر لي سبكه فريد = وانشر اللي بالمثايل ينفرد
يا زعيمي في الشعر بك وجد غيد = كلما حاولت نيله يبتعد
كن على فرقا مضانينك جليد = تدرك الغايات لو طال الأمد