قصيدة ( عود بلا دخاني )
الشاعر : الشيخ محمد بن راشد المكتوم

يا حي من لاقاني=صدفه بدون وعود
رحب بي والتقاني=تراحيب الودود
لطيف ومرحباني=ونزه عن المنقود
عوده كالخيزراني=تلع الرقاب عنود
اوقدت بي نيراني=وبادرتني بصدود
يالريم المودماني=ياليفال الشرود
من لحظاته رماني=على محرك لعضود
عينه هدبها جاني=شروا صف الجنود
لو ينظره انساني=وقف شروا المفوود
يا غزيلات اعماني=يا ترفات الخدود
يا شوبه الرماني=يا فوعات الورود
وقف لي لو ثواني=ان تسمح يا عنود
فجرت بي بركاني=واطما كل السدود
عطشان او لا سقاني=ارواني بالصدود
اسقاني الحنظلاني=ومن الجبن مزيود
عوقي مبطي زماني=قدلي وأنا ميهود
من تختلف لاوزاني=درب الشعر مسدود
دكتورنا لي حاني=ما ياني بالورود
من عادة الدياني=والمستلف موجود
يوفي بلا نقصاني=والا وعد محدود
على هذا ضمياني=انه رصيده عود
بافسره تبياني=وعندي عليه شهود
من عدلات المباني=بنيان بلا عمود
بيت الشعر إن زاني=هوالذي مقصود
معدل باوزاني=شروا صف العقود
لولو مع مرجاني=ناصع بياضه زود
يحاول الانساني=لغز عليه اردود
بنشدك يا فهماني=يا فكاك العقود
عود بلا دخاني=هل يصلح للوقود
ما يفيد أي انساني=لو يريد منه زود
لا يلحق لولاني=طاح بحر الهمود
هذا اللغز مجاني=تنظر فيه الحشود
اطلب أنا سمحاني=إن ضايقت البنود
سلامي بالتهاني=عدت نسيم النود
يعم كل انساني=لي يسمع المردود
للحضر والبدواني=اهل الشرف واليود
يا الله يا سبحاني=يارب يا معبود
من ساري دناني=يا اللي سحابه يود
لي بارجه زفاني=ساري يدن رعود
من عقب لمسياني=أطراف سحبه سود
من بوظبي وعماني=والعين ياها يود
واشمل جدي الخزاني=وغرب لين النفود
في دبي اروى المغاني=والبر زاده زود
ما طرشوله عاني=ولا سار حد يرود
تمت غدره زماني=ومسويات اركود



قصيدة ( كل عود له دخاني )
رد الشاعر : الدكتور مانع سعيد العتيبه

يا مرحبا بالعاني=لي يا ابهبوب النود
لي بالشعر حياني=شيخ شهم معدود
او شوقني ابها الأغاني=نبع ايفيض إبجود
قريته امن البياني=اوفهمت لي مقصود
من بوجسيم الفاني=الصاحب المودود
نظم فيه المعاني=جواهر واعقود
باقوم له فرحاني=او باصوغ له مردود
ما بشتكي تعباني=عن لا ارد اردود
او لا بنظر الدياني=حقه ايوفي ابزود
غير امحاتا المعاني=وامدارات السدود
في الموج المغرقاني=أشركني ابمنشود
مع الرئيس الباني=لي يصدق الموعود
هو قايد او رباني=او نحنا معاه إجنود
يا من شكيت إتعاني=حرة هجر او صدود
واتابع الغزلاني=في السيح او في النفود
تشكي غريم حاني=خل طبعه عنود
الريم المود ماني=دومه ذاير شرود
إلي به مولعاني=عل منهله باورود
واصبر على الخلاني=لي وثقوا لعهود
لو ياك من ألواني=هجر او نوع الصدود
عساك له كسباني=واتنال لي مقصود
او تازم معاه فرحاني=او لا تشتكي ميهود
الحب من ازماني=من عادات الجدود
ما يحمله لي داني=غير الذي معدود
شهم او ذرب المعاني=ما ايهاب امن الصعود
اولي في الهوى ضمياني=يشرب او يطلب زود
او مثلك أنا شفقاني=او ناس علينا اشهود
متصوب من زماني=وارقب يوم السعود
لي صابني وارماني=خشف الريم الخرود
امدعج الأعياني=حط ابقلبي عمود
لي خزني وافناني=من نظرته بإبرود
له اليديل الجاني=امسبلات إجعود
يضفن على لمتاني=او يسحن إبدهن العود
والبارج الزفاني=من ترفات الخدود
وانهود كالرماني=في صدر له قعود
والعود الخيزراني=بان غشاه النود
يعطي عوده لياني=مثل المها لورود
أشقر عديم الواني=ماله مثل في الخود
لي من رضي احياني=او لي من زعل ميهود
له يرجح الميزاني=ويحوز كل الزود
او له في الحشا تبياني=سيدي وأنا المسيود
قمت اتبعه واعاني=في لفتاته شرود
له درت في لوطاني=وين اخبره موجود
امن المين او عاني=لين الحمره الورود
او في الظفره الغدراني=تطمي على لحدود
او حول المحاضر زاني=عشب سقاه اليود
او دلما او صير اوطاني=ترعد عليها ارعود
يادت على النجياني=او بينونه إلها الزود
او رمل الختم روياني=والطف سحبه سود
والعين ابها مغاني=او في بوظبي لورود
او لدبي والخراني=لابد لي من رود
عقب السير إبضماني=شرق جدا لحدود
أنكف جداكم عاني=في ميحان الوعود
كل عود له دخاني=او كل مطرب له عود
تعزف عليه ألحاني=او يحلا به المنشود
يا إموازن البنياني=إطلب اوخذ الزود
إلكم علي أيماني=ما نخر المردود
يا غيرها الشغلاني=لي بدني بإبدود
اولي يا الشتا والفاني=فيه الفرح واسعود
سرنا إلباكستاني=او للمغرب إلنا إردود
مع سيد الأوطاني=نبغي القنص وانرود
زايد بنى بنياني=في ذا الوطن مشهود
تشهد به الجيراني=بر او بحر ممدود
او معنا من العرباني=قبايل واحشود
وامن الحرار ألواني=إموضبات إبزود
شقر فيها او دماني=حمر او سود او جرود
من غاليات أثماني=تبهر عين الحسود
لو من ورا الكثباني=طلع لها موكود
صادت عشر او ثماني=صيد لها معدود
لي دايم ما إتواني=او لا تسبقها الشرود
او لي يا الصيف او باني=في العين إلنا وجود
دار غدت بستاني=او بنخلها بتيود
او فيها من الرماني=وأنواع من عنقود
زادت على لبناني=في جوها والنود
يا فاهم بالمعاني=لي تفهم المقصود
قدرك كبير او شاني=لك عندنا موجود
إسمح عن القصراني=إن بان في المردود
وادعوك يا رحماني=يا ربنا المعبود
إتبلغنا الأماني=وانفوز بالموعود
او عالمصطفى العدناني=صلوا له يا سجود