رد على ابيات الشاعر الشيخ المر بن الشيخ مجرن
والتي منها

أهديتني يا شيخي طير=كالبرق والدولاب سيره




قصيدة ( حي المثل حي التعابير )
الشاعر : الشيخ محمد بن راشد المكتوم

حي المثل حي التعابير = من شاعر حكم ضميره
فاهم قدير ويمدح الطير = وعلى الصقاره نستشيره
شوير قوم وم الصجاجير = يوم الردي يا زم نحيره
مترى القنص سنة هل الخير = ومخلف لاهل الجزيره
عادات من عادات تطوير = مغزى عروبتنا الجديره
خذ الحذر يا راعي الطير = ولك النصيحه والبريره
اجمعن عقب المصافير = في روضة خضراء نظيره
قرب المسايل والدعاثير = تلقى أثار يهن كثيره
الشرد البيض المغاتير = إن دوقت شمس الظهيره
يداقلن طفق على السير = ويتبارقن لمع البصيره
بعيد طارن من عقب ذير = يبغن فضا شرد نفيره
الحر لا شقر والسناجير = ولمذهب اللي فيه شيره
مربوع لو في عينك اصغير = اندبرن عنده ذخيره
حمو الهدد من سرعة السير = الريش في جوه نثيره
ياكم ودم للمناعير = واعشاه إلا من نسيره
فرخ من الشقر النوادير = ميهد في المسراح غيره
وابيض نداوي بكر وكبير = من وقفوا تل اليريره
وتكابرن زول المعاثير = واطرف اوصاد الكبيره
تمن بقاياهن مخامير = مثل الشير باقي دميره
طفوا وكل هد له طير = وعند الهدد كل ابصيره
في خايع فيه المخاضير = والحمه السوداء القفيره
ضوت مخاليهن مزايير = وكل ايحسب اهداد طيره
الدهم والحمر الكواسير = والشقر والبيض النديره
وحمر الشواهين المناعير = والسود والجاني خميره
وقريع لمعقل ابتسفير = أفيح وسيقانه قصيره
فرس صوايدهن مدافير = إلضربة العاند خطيره
الا الأخيضر ما منه خير =ضووه مفلس في الحضيره
ملس الصوايد م المعاثير = حقال شباك أو حشيره
راعيه دايم يطلب اكثير = ويسوم وجهه عند غيره
والختم في نظم التعابير = مترى القنص يبغى خبيره