قصيدة ( يا شعراء لي يدرك الخافي )
الشاعر : الشيخ محمد بن راشد المكتوم

هاض ما بي بيح الخافي = وابعدت صوتي لواهيده
لو طلبت النجده إسعافي = السعايف عني ابعيده
يا شفاتي شفت أشفافي = في شفاي أشتاف تشييده
بي من الدعجات لرهافي = قايدات الكنس الغيده
تنعزل عن يمل لو لافي = ما اليهام أوعن مفاريده
ينهصر مدماي لاطرافي = مايد ومعزل الميده
الرمك عن وصلهن كافي = والأرام امتلع الجيده
عن منالي ما صفا صافي = يا فوات فيه توحيده
خايع في مهمه عافي = واختطفني عنه تفريده
لو بغيت آعوي لانجافي = المظافي عن مواريده
يا شعراء لي يدرك الخافي = والأمور ازمامها بيده
ولي يحل اللغز عرافي = يستحق الجايزه فيده



قصيدة ( الهديه )
رد الشاعره : فتاة الخليج

الهديه يتني أصدافي=هوب لي من أول آحيده
يا زعيم الفكر يالوافي=فيك معنى العرف تفريده
والفهم من نبعك الصافي=والأدب فنه وتجويده
همت بين اعصار عسافي=في شموخ إجبال امشيده
لا ذرى عندي ولا اتقافي=في النزول أو عسر تصعيده
بين موي ابحور ملقافي=ما يصك القوع بليده
ذاك لي خلاني امجافي=في احتراس وفكري آعيده
ما نولفها من الطافي=لي على المزبون تقليده
من نضار أوتبر شفافي=كم خشف زان به جيده
تهت بين اشعار عرافي=في بيان السبت تحديده
كل منهم خايعه عافي=ما يدوس الرسم تسنيده
يا محبي عوج لانجافي=وانتهل صافي مواريده
إن صفا لك منهل صافي=من منالك في توديده
عود له والعود لانصافي=والحقه لو داره ابعيده
لا تشيل اهموم واحسافي=كلها من غيرك ازهيده
يا هوى الخفرات ياسنافي=اشقر ينب عن الصيده
وين شيل الشربت ألحافي=والرهام أوناعم الميده



قصيدة ( هاض ما بي صايب القافي )
رد الشاعر : صالح بن علي المنصوري

هاض ما بي صايب القافي=وضمتين فوق تشديده
ولا يحوز اليم غرافي=كوكب والزايد لإيزيده
ولا يصيب الحق بنصافي=غير من حيد تواكيده
ولو سرح للصيد لقافي=النكد له صار تلديده
فاهم ويشوف لهدافي=ولو قريب إنزاحت ابعيده
وكل مغزا فيه منكافي=والشهر معروف تمديده
والزمان ايرد عكافي=ما يوصل راس تمهيده
والليالي نورها طافي=والسبب في الوقت تهديده
فيه ولد الذيب يختافي=والثعل له صيدته بيده
بين حرف النون والكافي=طلبة المطلوب توجيده
وان تهايت طلبة الشافي=نور سعد في ضحى عيده
ما نشد من زول لطرافي=ولا يهمه زود توريده
ولو توافق شف لولافي=فل شمله من مقاريده
ما يون الليل متعافي=في العنايه وين ترقيده
ومن يصوب في الحشا الخافي=يشفي المصيوب ويفيده
ما نزل في كل ميهافي=كون لي مجهول تمجيده
وان فهم للغز عرافي=يفند المسيود من سيده
واللغز في راس مشرافي=والغشيم الياهل إيكيده
مثل نجم فوق ينشافي=وين وصله وين تحديده
والعفو يا الناس لشرافي=شفكم ورضاكم آريده



قصيدة ( حل اللغز )
الشاعر : الشيخ محمد بن راشد المكتوم

حي من رد المثل وافي = جوهر اليكات تصفيده
له وزون اثقال لوزافي = تدحر الوعره مزاييده
اشعرانا قولهم كافي = مورد ينهل مواريده
كلهم بالقول عرافي = شعر يستاهل تمجيده
ركبهم ما مر زلافي = قولهم دانات بليده
قول مثل المنبع الصافي = أو هجيج اعيونه بعيده
كم باخفي خفا الخافي = يفهمون الشي لي اريده
دمنة الفرسان لحلافي = من دهور اصعور امشيده
ماضي يذكر للاسلافي = حاضر يوفي مواعيده
والنزو العالي النافي = يا حلا منكم ترديده
والحكم والحق لنصافي = تثبت الدعوى شواهيده
سلتني في بدع لوصافي = امعنا ضرب الهدف صيده
يستزل القانص وخافي = مطرج من خوفه اتصيده
أسع الحوطات منزلافي = والوحش حوطاته ابعيده
خايع دونه ذرا عافي = الفيوي ونازجت بيده
الرمك عن وصفهن كافي = ولا أظن ابخيلك اتحيده
يا زعيم العند اللافي = انفراد الشي توحيده
الوفق في صيد لصدافي = شفت لكن ما حصل صيده
قانص للصيد تقافي = متعبني في مشاريده
أحوري مياس لعطافي = قايد الغيد الأماليده
أتبعه تبع الطلب حافي = واستزله في مصاييده
ذار في محواز لكشافي = خز وابعد في تفريده
ليت حظ السعد مسعافي = با الذي يهواه ويريده
الجواهر كلها اصنافي = نضد من مخزون سريده
ناخذ الصافي عن الغافي = لي على الموزون وانجيده
م القوافي هوب متلافي = ناعم الأنساج تمديده
جوهري القاف عرافي = عالي المنظوم تجديده
كالحجر لي ماسها صافي = تنور الغشمه مناضيده
إن ركبنا الضمر اكلافي = خيل شعر تقطع الريده
ما عسفهن كل حرافي = في ميادينه وتسنيده
جوهر ما مثله اوصافي = مثل عذراء في ضحى عيده
الزمرد لونه الصافي = والصفاوه سعره اتزيده
نافل في زينه النافي = والشعر جودة من ايجيده
لو خفيف الوزن شفافي = في ميازينه تفاريده
ذخر والمذخور لسعافي = من زرع يحصد محاصيده
الشعر موياته اغدافي = سابح في غزر بليده
ما عنيت اللغز بالقافي = وعنكم آصعب تحديده
غير قصدي شي ينشافي = والمثل يحلا ترديده
كم في لشعار عرافي = رد واشهر في مناشيده
اذكره وآحيده إسنافي = واذكره واعرف تمجيده
يا نسيم الفجر هفافي = هف وهفت به مساهيده
طاب في نوم الكرى غافي = والسهر يعتاد عويده
قبل نور الصبح ينشافي = والفجر بانت شواهيده
كم خليع ذب مشرافي = للعشا تعوي لواهيده
ذخرة لي في الزمن وافي = في مدى ليام لمجيده
ما تسع فتقه على الرافي = كل ابغزله نسج بيده
ولي حمل للشربت الحافي = م اليهام ولول انحيده
والا انا همي ولحسافي = حيلتي يا ناعم الميده
الهوى للصب تلافي = حرت آهاته وتنهيده
مرة يعطنك الجافي = ومرة وحظوظك اسعيده
غير لكن صار مهزافي = واختلف عن ماضي آحيده
ومن تزايف كل زفزافي = زاف في زيت مزاييده
كم خضعت الطوع مسعافي = وهو عني في تعنيده
نور شمس لو قمر صافي = ما حلا الخد وعناجيده
مثل ما جنح الدجى ضافي = كاسي اخصور مجاليده
نور والديجور لطرافي = واليوازي عينه وجيده
في صخات النطق ملطافي = يتعب الصاغي تمريده
معدني الجود شفافي = شف واروى من هوى كيده
يافي ولاع الوعد يافي = في سلوكه اسلاك امجيده
عن طوير دوم رفافي = حظ سعده في مراغيده
في شموخ اجبال واتلافي = راسيات أرسى مواتيده
فوق نايف كل مشرافي = في الزباير والمنافيده
في مثلث بحر لحتافي = غامض توه رواويده
من دخل جوه بلجزافي = تاه في مبهم تحديده
بين بر وموي واسيافي = مثل زول قاطع قيده
والنسيم ايهب زفافي = والزهر محلا عناقيده
موسمي الوبل هتافي = عقربي مزره إيزيده
فتو عشب القاع متوافي = في زماليجه تعريده
والحمام إن ناح هتافي = في الخلا محلا تغاريده
والزمايم مثل لريافي = والفواع ابها مناضيده
عين حر للعشاء شافي = تاق واطلع في مياريده
شاف ربد الصيد تقافي = في تقف واقفوف ابعيده
تفرق الندر بالاوصافي = والحرار ابطلعها امعيده
لك سلامي خص يا الجافي = عد من جافا مواديده
أو عدد ما طاف طوافي = يدعي داعيه توحيده
إسمحوا إلناظم القافي = إنتوا فخره يا صناديده
إسمحوا لي والعذر وافي = أمتنع عن قولي آزيده
خوف من عاذل ومسعافي = يفرح ابعذله شواهيده