قصيدة (هل أحاسيسك معانا يافتون )
الشاعر : الشيخ محمد بن راشد المكتوم


هل أحاسيسك معانا يافتون = وهل دريت أنا بحبك مبتلين
حبنا من قبل ما تشوفك عيون = في محبتكم أسير كالرهين
إلتمحت الخد لي صافي بلون = والشعر ضافي ع المضمر يلين
نور وجهه مثل برق في مزون = والجبين إيشع بين الحاجبين
إن تبسم مثل ما در امخزون = والثمان اتشابه الصف الثمين
إرحم اللي يملك القلب الحنون = كم صبر في حبكم والصبر شين
لنكم في غيركم ما تنظرون = والسبب ذا لنكم مدلعين
جايرين في الهوى ما ترحمون = يا عذارى حبنا حب اليقين
إترك اللي في هواهم يزعلون = ومن عقب كل احترامي تزعلين
سيدي لا تدخل اوهام الظنون = وتستمع في قول ناس عابثين
كم لي بوهامهم يتمشكلون = تنعفس ليام وتمر السنين
احذر الواشي وتغيير الوزون = مثل تغيير التلاميذ العجين
مثل ما يبغون بك ويشكلون = لا تصدقهم ولو حلفوا يمين
كاذبين دايم ما يصدقون = وكم يللي من كذبهم عايشين
والذي يصدق وفي قوله يصون = قالوا ان هذا من المتأخرين
إن كتبت الجيم قالوا حرف نون = وان كتبت النون قالوا حرف عين
كل يوم يظهرون بالف لون = والذي واضح غبي ما يبين
آه لي ضاجر ومظنا بالظنون = مستظيج ويا حمد به عصف بين
حل موضوعه عسنك لا تهون = حيث لنك شاعر فاهم فطين
والف صلوا عد ما هلت مزون = واختلاف الناس من فتره وحين



قصيدة (قلت للشادي على روس لفنون )
رد الشاعر : ابو شهاب

قلت للشادي على روس لفنون = لي يجر الصوت باللحن الحزين
يا ألف لبيك وابشر بالف عون = في الأوامر يالشهم لك واقفين
والمشاكل مايضيق ابها الكون = للمشاكل حل وانتم عارفين
يوم تنشون الشعر تتفننون = تنتقون امن الغوالي كل زين
ومن بساتين القوافي تقطفون = بالذكا والذوق ورد الياسمين
في موازين الشعر تتحكمون = حسب ما تبغون باللفظ الحسين
والامثال اللي بها تتوصفون = في زمنا صعب توجد يالفطين
النظم وايد لكن لي يشعرون = في العدد ما جاوزوا كف اليمين
يا المعنا في هوى سود العيون = لي عليه النوح دايم والحنين
ما عليك امن الزعل ما يصبرون = فرق بين القول والحب المبين
يوم ما يرضون كيف ايتلفنون = خذ خبر صافي مثل عين اليقين
مثل ما تسأل كذلك يسألون = والمحبه ثابته بين الثنين
بس توهم في الهوى يتعلمون = والتجارب في الهوى تبغي سنين
هم يعزونك لكن يدلعون = والعذارى ع الدلع متعودين
جس نبض اللي بحبه تشعرون = كود خلان الموده عاتبين
هم يحبونك لكن يتوثقون = وان بغيت الحق ربعك حاينين
عامل المضنون بقليب حنون = والطف ابخل لشانك مستدين
وفي ختام الجيل نرجو تسمحون = كود في بعض لامثال مقصرين