قصيدة ( قالت تحبني .. قلت ساعه وساعه )
الشاعر : ابو شهاب


قالت تحبني .. قلت ساعه وساعه = ما هوب دوم مديم يا قرة العين
قالت يقول الصدق والا خداعه = قلت الصحيح اقول لو ما بترضين
يمتاز حبي بالصدق والنصاعه = ماني من اللي في هواهم مراوين
مالي على الحب المديم استطاعه = اخشى يضيع مني العقل والدين
واخسر هوانا والحيا والمناعه = وأصبح مثل بين الملا كالمجينين
قضى حياته في هيام ونياعه = بين البراري ما يهبط البلادين
خلا الأقارب والأهل والجماعه = وافلس من الثنتين واتعوض البين
أحب وادي للمحبين طاعه = لكن في حدود العقل والعقل زين
قالت حديثك هب صراحه بشاعه = وين اللطافه منك والعطف واللين
قالت .. وقفت مسرعه باندفاعه = وبجيت من بعد الجفا بين نارين
يا شيخ يا من طال من الشعر باعه = لي له اعلام القافيات الميامين
مجنحات يرفرفن في ارتفاعه = فخر الصديق ونقمة للمعادين
ليتك تواسي قلب زاد التياعه = يا من يجدينا على المسلك الزين
ضاق الفضا بي بعد رحب اتساعه = من وين اييب الحل لمصيبتي وين



قصيدة ( أهلا عدد نف المطر بارض قاعه )
الشاعر : الشيخ محمد بن راشد المكتوم

أهلا عدد نف المطر بارض قاعه = وعد الحلي اللي تزخرف به الزين
وما خطت الأقلام حرف الطباعه = واعداد من ساروا على الضمر الهين
وعداد ما خط المولع يراعه = قاده هوى حب المحبين شفجين
واعداد ما شعر نشا في بداعه = شعر بدالك بالطرب والتلحين
وعداد ما غنى ونصغي سماعه = طير بخضر النايفات البساتين
وعداد من صلى بصف الجماعه = واعداد من طافو ببيته ملبين
بللي شكا لي من محبه اوجاعه = يشكي من الهجران ومعانق البين
يا بو شهاب اجمع فروضك رباعه = وخل الأمور اتسير ع المسلك الزين
عسن تكسب في صلاتك شفاعه = ومرضاة خلان المحبين راضين
واتبع هواه وخل عندك قناعه = واحفظ عهود عن كلام المواشين
لو كان عندك للحبيب اندفاعه = لا تستوي بايع والغير شارين
واحذر من المظهر وشكل اصطناعه = ظاهر من الكوفير ومصبغ العين
الحب طابع واللطافه اطباعه = جان الشعر بيفيد بكتب ملايين
الحب ظالم والمحبه ولاعه = بين الحبايب ذاك شرع المحبين
من عاشر الخفرات لو ربع ساعه = لازم ايصيده في هواهن تجنين
الغنج اللي في هواهن طماعه = الخرد الكنس عذارى المزايين
وأنا من الحرات ذقت التياعه = يلعب بي التيار في بحر تسعين
سنان ومعلي ومرخي شراعه = غبة سلامه بين هرمز وشطين
ما لي على التعذيب قوة شجاعة = يا معذبي وش ذنبنا يا لمحبين
متمسك ابحبل الرجا والقطاعه = وبمسك ولو باقي من الحبل بتلين
ما شفت قلبي كيف صار اندفاعه = صوبه خفق زد القلوب الملايين
جرح الهوى خوفي ايزيد اتساعه = واقف على مرماه من اريش العين
يا ليت من هو في الهوى طلق باعه = يعرج سماء العشاق بين الميازين
عندي عن الطفجين جرعة مناعه = شم النسيم اللي هواها تذنين
ان هد في الصيدات عنده قطاعه = امن الحرار الشقر هب فرخ شاهين
بنت لبن حوشان تبدع بداعه = وهي تقول ان المناعير صلفين
سلام مني والتحيه رباعه = أهديه بالصفحه على المطلع الزين