قصيدة ( احتجب نور البدر عنا )
الشاعر : ابو شهاب

احتجب نور البدر عنا = اشهرين أوطل بانواره
كيف ما نشدو ونتغنا = والسعد تترنم اوتاره
والزهر يضحك ويتثنا = والعبير يزف نواره
والخزاما نفحها بنا = في ربوع ادبي معطاره
والنسيم ايداعب الفنا = في طرب ويحرك ازهاره
والحمام الراعبي غنا = ما السعاده باجمل اشعاره
والسباق اللي له اتبنا = بالجوايز فازت امهاره
بوجسيم اللي به انهنا = في هضاب المجد مقداره
كيف ما نشدو ونتغنا = والسعد تترنم اوتاره



قصيدة ( مرحبا بالجيل لمعنا )
الشاعر : الشيخ محمد بن راشد المكتوم

مرحبا بالجيل لمعنا = م الصميم أو خافي اسراره
من خوافي روح لمكنا = في الشقا وتبات سماره
كم بالزينات يترنا = في الخوافي ناظم اشعاره
بوشهاب اللي له ايعنا = كل شعر رتب اسطاره
باذل المجهود ويهنا = شاعر مذكوره أشعاره
وله تحيات بعد منا = من جويد الجيد جدراه
لا تواخذنا وتتهمنا = بالعذل من بعض ذماره
صاف من لا صاف ما كنا = في صفاف أو صفت ادياره
كم شاعر غيرنا غنا = بالنضيد وطيب افكاره
واستمعنا واستمع منا = وكل بسنيور مسياره
واعذب الأشعار تجذبنا = باتجاهه لو نزح داره
ولو تمعنا وفكرنا = فرصة للغير مقداره
يا صديج الخير والفنا = مفردات الشعر جباره
هاجت الأفكار وتبنا = من سلايس ناسج اشعاره
والشعر ينظم ويتبنا = بالقوافي نبني اسواره
ومن غزى غزال يتجنا = حر فالي لاظيه ناره
جوهر طواشه اتعنا = غايص الهيرات سكاره
وين يقصر حبله السنا = في غبيب أو غزر مغزاره
ومن طلب السلو والمنا = تاه والأيام دواره
ونتي ونات من ونا = حن واضنابه هوى داره
لك سلامي عد ماثنا = مورج تاهت به اثماره
أو عدد ما رفرف اودنا = مرعد يادت به امطاره
يادنا واسقى وطن هلنا = والزميم أوشاسع ابراره
والمحاضر مثل ما قلنا = ترتوي من يود مدراره
وكل طير ابشادنه غنا = في رفايف عالي اوكاره