رسالة من " ابن زيدون "
الى الشاعر " سليط "
ينقلها عارف الخاجه

زاهيات هفجن في كل رابش=هن غناوي غردن والشوق ينعش
عسعس اللي شطهن وامسن طوارش=صوب موق في الفرح والحزن يجهش
دارهن حسبة زمان ابلا هوامش=فيهن الجيوان على الأعناق عرش
طرزن ثوب الحسن والنور فارش=قلبه اللي في سما التسبيح غبش
طرشن في الأندلس ألفين طارش=يا " إبن زيدون " حال الغيد ممتش
في سبع طشات كان الصوت طايش=بس قلبي ما بغى ماجد تهبش
غير " ولاده " عليها الحلم رامش=واعدتني والوعد ساعات يخدش
لو أواسي أو تواسي الكل ناعش=يا هوانا نورس في الكون عشش
يا أنا الموال في ناوي المحارش=يا هواها ومضة في الجوف تنخش
ومضة تغشي وترسي بالنواقش=أول الأعراس إن حر تنفش
عقب ذاك الوعد صار الوعد خادش=وانجرح وقت بميلاده وتزركش
افترقنا والسبب سود المهابش=حرشت جمر البلا حتى تحرش
وآزمت لقلوب تنهشها النواهش=وآزمت لبلاد تاريخ مخربش
لا غناوي عقب " ولاده " تناوش=لا سبع موجات لا موجه ولا رش
سيدي اسليط ييت اليوم جاهش=يمعة سارت وموال تفكرش
زاهيات واصبحن ما ميش مامش=لا هواهن اشتكى لالا ولا نش



قصيدة (من يسافر في بحر والموج طايش )
رد الشاعر : الشيخ محمد بن راشد المكتوم

من يسافر في بحر والموج طايش = ارقصت لمواج به والسفن تنعش
في غبيب سود غزر أوهام داغش = بين لطم الموج واليريور ينهش
جيون الغزر اللواجي م الطواوش = والذي ما غص غرز القوع دردش
زاهيات نورهن ياضي وداهش = بنت تلبس سبعنا دانات عرش
حاويات المجد ولهن طيب حايش = في السواحل شوف كيف الورد نفش
يا ذكي يا فهيم للتناقش = عند بن زيدون قل يسال لا ربش
ارتفاع الصوت يوصل كل نايش = ومن خدم في واجبه هل كيف يطفش
وعد ولاده وعد ما فيه هافش = وتمشي ابتاريخ لايام اتزركش
ياني الموال وبلحن المحارش = ما يحرش ساكن إلا كاد يحرش
واقفات احضورهن وتقول ما مش = بينات كلهن والجو مدهش
الغناوي صوتها يللي يناوش = ومن وقف ابموقع الإيقاع ينعش
ومن سرح في الصبح قبله كان غابش = ومن تبلش بالبلش لا بد يبلش
طاير النورس يحوم الجو هاوش = وكل طاير يرتفع في الجو يوحش
السوالف كل ما فيها تناقش = وكل مخطوط على الصفحه يفتش
يا صديق بالجرايد خط ناقش = ويا عميل الخير ما هذا ولا مش
السموحه نعتذر من قول لاغش = كم حساد القفا بالقول تلطش