دق العود ابتقايف = يا ميحد للوصاه
قول جزل الوصايف = لي يسمعه يهواه
هزفني بالهزايف = وببدع على نحواه
نظم عده طرايف = محلاه لي غناه
مصعب فرقا الولايف = ولانسان لي تهواه
يا ريف ياللي طايف = بالله تنقل وصاه
حبه فاعل صرايف = والحق حالي قصاه
خدينه والشفايف = والعقربي محلاه
مرسومات عطايف = في غرة امحياه
لو من تحت الغدايف = نوره يسني سناه
عينه شرات الخايف = حر فارط عشاه
توق المعيد الشايف = طلعه دونه تقاه
لي في روس الشرايف = سكناته في العلاه
دونه بعد وتنايف = كوكب عالي فضاه
خلا يرحي نزايف = والشق من يرفاه
ماله طبيب شايف = يتخصص في دواه
خلاني في حسايف = قلبي عطف مجراه
عطف اعصي العسايف = لي للقبضه عواه
لي يرعى في الجفايف = تعب القانص وراه
ما ناله بالكلايف = لا ذا ولا برضاه
شروى موي العصايف = لي تياره طماه
تله تل النجايف = تل الجليب ارشاه
قدهن ظمر نحايف = حفيات من ممشاه
شروى قوس العطايف = قصياء وفي مظماه
مشاهن بالكلايف = ودرب السوا ماياه
ياني يطلب نصايف = والحق في دعدواه
حقه وخذ ابكلايف = غصب بدون ارضاه
جيف يستلذ الخايف = ويرتاح في ممساه
خلوها بالخفايف = لا تكشفون اغطاه
به خصرين نحايف = لي عالي مستواه
لي مستذير وخايف = خلوه في قفراه
لو كل من يا لايف = تاح ولجي حصباه
جان اغتنى لمضايف = وكل حصل رضاه