رد الكرى للعين من بعد ما كان=حريب لها .. والسهد في منزله كاني
وزالت هموم القلب من باطن الحشى=على حين ماعاينت بالعين الاوطان
عروس الخليج أعني دبي العزيزه=بلاد أفضلها على كل بلدان
بلاد ولدت بها وقلبي يحبا=كما حب والدة على طفلها حاني
أعادي أعاديها ومن عاد ضدها=واكافح بجهدي دونها ثم بلساني
ولو فرقت الأيام بيني وبينها=فلا القلب ينساها ولاهيه تنساني
أهمع دموع العين إن مر ذكرها=على مسمعي وأزداد ليعات واحزان
أرى بحرها شهد ومسك ترابها=وحكامها كنزي وسوري وشيخاني
أرتع بهم نفسي إذا اشتد عسرها=وبهم أمنيها على خير ريحان
ولا خابت الرجوى التي من جناهم=ترجيتها في حينما الوقت جافاني
ولما معطت ايدي في حال حاجتي=إليهم ملوا لي كفها دون مطلان
وكم كم من مثلي إذا حده القصى=نصاهم ونال اللي به القلب ظنان
ويا رب تجعل ( راشد ) لنا ذخيره=وتجعل بقلبه دايم نور الإيمان
وزيده على مجده وعلياه رفعه=واجعل عدوه في نزول ونقصان
وقو اظهره بالشيخ ( مكتوم ) ولده=ثم بعضيده صاحب المجد ( حمدان )
و ( محمد ) المحمود و ( أحمد ) كذلك=ويا رب تجعلهم على الدوم عضداني
وكن عون لا عيان البلد ثم شعبها=وثبت عقاسدهم على الأديان
وسدد أبواب الشر عنهم مع البلا=وارفع لهم شان على ذلك الشاني
ترى الدار بالأجناب تضحى وهيه=وبأصحابها تزداد عز ورفعان
أنظر مباني ( الوصل ) كيف تزخرفت=ووقظ لها قلبك إذا كان غفلان
إلى السبع ثم العشر رفع اطبقاتها=وقامن على قوة قواعد وعمدان
قصور تشوق أهل البايب بشكلها=إذا قمت تنظر ذا .. شغب قلبك الثاني
طووهن برستات تلتها شوارع=فلا في الهزر تتلف على طول الأزمان
وجسر على السيفين نصب وفوقه=تخطف سيايير ومن تحته أسفان
وان ييت للساعه إلاها عظيمه=ترى نورها يغشاك من الاركان
وافضل صلاة الله على سيد الملا=محمد شفيع الخلق في يوم الامحان
مع الآل والأصحاب ما قال مولع=رد الكرى للعين من بعد ما كان