يالله أنا طالبك يا رب العباد =يا رافعٍ سبعٍ بليا عمادي
تقبل دعايه يا سريعٍ بما راد =ولا أطلبك غير الغيث يا خير هادي
بمزنةٍ غرا من الغرب تنقاد =ويسوقها ريح السهيلي بجادي
تسمع رعدها كالصواريخ لجداد=ومن يود ماها سيلت كلّ وادي
السيح غدّر والرمل ينحفر ثاد =ولي راح هذا لن هاذاك بادي
صوت الرعد يسهرك لو هو م الابعاد =وتشوف برقه مثل لمع الهنادي
تسقي من الظفره إلى شرقي الساد =يود يعم الحضر ويا البوادي
يالله عساها تجود في دار لامجاد=أهل الثنا والجود ضد المعادي
سلالة نهيان عربين لاجداد=ياللي حكمهم من على عصر عادي
عساه ياتي في الفطر بين الاعياد =بين الشتا والقيظ حل البرادي
وقت الصفاري يوم كله له مراد =أحدٍ بدا واحدٍ نهي للبلادي
اللي ظهر للبر ينزل بالابعاد =ما هوب فوق العد بارض المنادي
يازين مظهور البدو يوم ينقاد =وشوف العشاير وسط ذيك الريادي
وصوت الفحل فيها كما صوت رعاد =ما يصوعونه يوم حل الهدادي
وخلفاتهم تاخذ شهر عقب لولاد =ماتنشمل ومزينه بالعتادي
وحيرانها في العشب طيح ورقّاد =عشبٍ خضر ما يبّسته النوادي
وبيت الشعر يبني على حجب وعماد=توه جديدٍ ظاهر من المسادي
وجمر العبل في ربعة البيت وقاد =والنير يلعو مثل صوت المنادي
مره يدق البن وامرار لقناد =ويحط في دلالٍ نظاف جدادي
هاذيه قولٍ صدق ما فيه جحّاد =هاذيه شيٍ شايفنه وكادي
من عقبهم يا بوجبر مالي اقعاد =عيني سهيره ما غضت بالرقادي
ولو ان الفتى يعطى على كيف ما راد =دوّرت ما ابا غير ضاع احتيادي
دار الحضر ما تجوز لي لو هم أجواد =وأحب دار البدو كيفة مرادي
عسى وطنهم ينسقى يود رعّاد =وسميةٍ تاخذ شهر بالعدادي
أهل النفوس الطيبة نسل الاجواد=كرام في وقت العسر والشدادي
والا الردي إن مات وإن حي وش عاد=ماتنفقد غير القروم العوادي
عليك باللي يتقي كل ما كاد=والا الردي كبّه ولا به مفادي
مثل الكريم امعان في كل ما راد =والصبر محمود العواقب وكادي
مترى الكرامه كالشجاعه ولو زاد=وإن فلت م الاثنين وين انت غادي
ما دامت الدنيا لكسرى وشداد=ولو طوّلت متلاتها للنفادي
يبقى العمل والعلم من بعد الاشهاد=والموت ياتي الطفل لي في المهادي
وصلاة ربي عده ما تهب لانواد=على النبي المختار سيد العبادي