يكفيك يا المضنون غشّ أو خداعي=و أنا كفاني منك لهموم و الضيج
ما في غناتي للاسف مول داعي=ارجوك تبعد بس منها التّهريج
لا تحسب أنّي اليوم لجلك اراعي=وارعى عهودٍ بيننا والمواثيج
انت الذي للهجر والغدر ساعي=ارميت من يهواك مجروحٍ اعويج
ارميتني وادعيتني في التياعي=لا شرب ينهالي ولا زادٍ ايليج
جاسيت من حبّك و بعدك انواعي=انواع من لهموم و اليوم ما طيج
ملدوغ جنّي من سموم الافاعي=وابجي وهلّ الدمع من شدة الويج
خلّيتني مخدوع: ما كنت واعي=جنّي مبنّج في هواكم تبنّيج
كنت اتحرّى في الغرام انتفاعي=ثاريك خاين صرت ماهوب عشيّج
أول غناتي كان لي في مطاعي=واليوم قفّا واحرق القلب تحريج
نحنا شرينا الود و الخلّ باعي=باع المحبه بالغرور أو تطفّيج
صدّق كلام الواش بالقول ساعي=وتّرك هوانا داعيّنا محاريج
فينا سمع خبرٍ من الناس شاعي=كلّه كلام احسود حجي المخافيج
إن كنت ناوي للفراق الوداعي=انقصّ حبل الود عقب التعليج
بنسا محبتكم ولو في ضياعي=وابنسا الليالي بالصبر و التفريج
و بردّ لك هيرك مع الصّاع صاعي=وباغلّج افوادي عن الحبّ تغليج