انا البارحه ما امسيت يوم العباد رقود=وعزي لمن هو م المفارق يبات ينوح
سهيره عيونه ما غضت ما عنه منشود=سهيره عيونه م المفارق بلا مربوح
على صاحب قفى ولا جا عنه مردود=وانا من فراقه قمت أجاوب حمام الدوح
تباعد مزاره في ديار وصلها كود=ولا به دليله صوبهم لي بغيت أروح
يقولون مشتى صاحبك من ورا لحدود=ولا به معالم بينه والأثر مكشوح
بديرة مضامي هوب نازل على لعدود=وكل يوم وهوه في شدود وراه يروح
وانا عقبهم لا انا بصاحي ولا ميهود=أقزر زماني بين واعي وبين طيوح
وانا باشتكي(لسعيد) لي يعرف المقصود=وان كان ما لي حل عنده فهو مسموح
أنا يا بن جاسم صابني من الفراق جهود=هواجيس شتى ضاويات وشي سروح
وان كان أنا غلطان مترى الغلط مردود=عليك التصرف وانت في قصتي مبيوح
أحيدك تعرف القول لي ما الحقه منقود=تعرف المباني وشرح القول لي مشروح
أنا صابر للفرقيا يعلها ما تعود=توثر على الولهان والسد منه يبوح
أنا بشهد ان الفرقيا ما وارها زود=عسى الله ا يطول بفرقا عديل الروح
عسى الله يجمع شملنا في ليالي سعود=بيوم يداوي علة القلب لي مجروح
سلامي عليهم عد ما هب شرتا النود=سلامي يخص اللي وداده ما هوب مزوح
سقى الله دياره من حقاب يدن رعود=على دارهم ينهل وبله مسا وصبوح
بنو من القبله يسوقه هبوب النود=ولظيظ إبرقه طول ليله يبات يلوح
تشوف الشوامخ فيه مثل الجبال السود=ركود سحابه هوب عيل يمر طفوح
ثلاثين ليله ما تشوف السما مفقود=وعقب اربعين يثور نبت الرمل وسيوح
تشوف الزريقا مشتبك بينها العنقود=رواعيه ريح جنوبهن كالزباد يفوح
بيوت الشعر تبني على الثاد غب اليود=تبدل زمان البدو عقب الكدر بفروح
ومن فضل ربي من الطوي تنقطع لورود=تشوف المغاني من المغادي تتم نضوح
تقبل دعايه يا كريم ويا معبود=ويا كاتب رزق الخلايق معه في لوح
يا زين ذاك اليوم يعله علينا يعود=بجاه الذي من الغرق نجي سفينة نوح