قال منهو ساهر ما رقد=والملا في النوم دلهين رقود
لي بغيت النوم من عيني شرد=لين نور الصبح سوى له عمود
يوم جاني الصبح همي ما برد=م المفارق كل ما جا له يزود
من فراق اللي وداده لي قعد=مقعد في الجوف ما ظني جحود
ينتمي بالطيب من خال وجد=هوب وارد مصر والا من الهنود
وبالكرم والجود له أهل تعد=في قديم الوقت من عصر الجدود
منزله في البر ما هو في البلد=مرتع الغزلان ربات النفود
ما يشتي غير في ذيك القعد=ديرة عسى ان توطاها الرعود
يعل لي من الغرب له برق ورعد=في دياره ينذكر وسمي ويود
ماه وبلي صبيب بلا برد=نعمة من عالم الكون الوجود
وانظر الخلفات من ذيك الرغد=في العشب حيرانها طيح رقود
في ديار ما رعت فيها الجعد=قفرة ما تقص فيها الا الرغود
وما يجيها الا على اسبوع ورد=غير لي منسي قطيعه بالورود
في المنازل لى خذ اسبوعين شد=في سنعها يسير عقب اما يرود
ما حلى ليمن ضوت صوت الهدد=في طرفها مثلما صوت الرعود
تضوى بيوت بناها من عمد=ما بنوها من سميت ومن حيود
بيت عز يوم تبغي باتشد=تنطوي حجبه وتنقص العمود
في ديار صاحبه ما بها جهد=لي حطبها ريحته كريح عود
يعل يسقيها من الموسمي مهد=لي مزونه كالجبال تشاف سود
يسقي الظفره جيمع بلاعدد=هوب بس أحرامها غدف الحدود
وينذكر جوده بدار اللي نود=بو عيون سود وحجاج معقود
بو ثمان كنها لو البرد=والجدايل من على متنه رجود
نافل بالزين وبزينه يعد=تكثر الاوصاف وبزينه فنود
كامل الاوصاف ان قام وقعد=وان مشى في الارض له مشيه بهود
وان هرج بالوصف مثل اللي بعد=مثل وصف اللي يعدون النقود
التقاني في الطريق بلا وعد=صدفة والا فانا قلبي جحود
قلت ليه شايب وقال اليه ولد=قلت لا والله أنا في السن عود
استغفر الله ويش فى عندك بعد=لا تولعني بحبك يا عنود
تايب لله الفرد الصمد=وخايف يا زين من يوم الوعد
والذي شرواي من هذا يصد=من هوى الخفرات ما له فيه فود
يوم وقت صباي به مستعد=ما سمعت اللي عذلني والحسود
راح وقتي وانقضى ما هو يرد=ولو يرد ان كان انا يومي سعود
والختم صلوا على من هو صعد=ليلة المعراج والعالم رقود