باديٍ في راس ما باني=مرقبٍ بيّح بمكنوني
ونّتي ونّات حبّاني=لي سمعت اللي يغنّوني
والكرى ما لذّ لاعياني=ما حصل غصبٍ ولا بهوني
ساهرٍ لين الفجر باني=واعتزل عن لي يصلّوني
والسبب من دعي لعياني =لي حدم قلبي بمسنوني
بو جديلٍ فوق الامتاني=أسمرٍ بالطيب يغذوني
والمعنّق كنّه ادماني=ماخذٍ منه عنق وعيوني
بو ثمانٍ حبّ رماني=لو برد طايح م لمزوني
من عطاه الحسن سبحاني=جاعد الأنهاد مزيوني
جادلٍ والعود ريّاني=ذاك لي يرِّث لك طعوني
ما يفيد محو قرآني =والدخاتر ما يفيدوني
ذي وصوف الزين يا اخواني =والحذر عن لا تِصَدقُوني
يغوي الانسان شيطاني=مغويٍ آدم الملعوني
وين قيس ووين هزّاني =وين بن لعبون خبروني
وين ماجد وين بن ثاني=وين بالوهاب نشدوني
لي ابتلاهم حب انساني=لا مرض فيهم ولا جنوني
يعل ما يجزى بالاحساني=شطّ بي ما خذنيه بهوني
صار حكمه حكم نصراني=هوب حكم اسلام قانوني
ما يفنّد عالي وداني=حكم للعشاق مسنوني
قبلكم روّانيه امحاني=من قبل لى تسكن جنوني
واطلب من الربّ غفراني=وكل شيٍ عنده يهوني
يعل لي ولّى م الازماني =وما كتب باللوح مضموني
يبدل السيّات با حساني=يا إله العفو والعوني
تم قولٍ وابدع الثاني =قلبي حقّ البدو وجنوني
ما حلا عصر المسيّاني =يوم بيت الشعر يبنوني
والذي تبنيه غزلاني =ما اظهرن وسط التِلفزوني
يشترون الستر باثماني=يشترونه ما يبيعوني
يوم بيقوّم بعمداني=ودقّق طنوبه المزيوني
حّطوا أحيابٍ له وداني=والرواق اللي تعرفوني
ينظره لي جاهم العاني=بالعلا ماهم يواطوني
فيه صوت النير رنّاني =دقّ بن ما لها سوني
والدلال دلال رسلاني=أربعٍ كلٍ على لوني
البدو في طول الازماني=يعلهم في خير يبقوني
لي كرامتهم بسفطاني=يوم بتجيهم يبشّوني
والبيوت بدون بيباني =يوم هشّال الخلا يجوني
لي لهم عند العرب شاني =هوب اللي ما يسرّوني
قوتهم من حلو الالباني=هوب مِ الدّكان يشروني
من عطايا الله مجّاني=نعمةٍ من عالم الكوني
طالب الله عالي الشاني=لي له أملالٍ يعبدوني
يعل لي من الغرب دنّاني=لي بروقه وسط لمزوني
لي يسوقه كوس ذنّاني =معطليٍ هزّ لغصوني
يعل جوده وسط الاوطاني=في المفالي وين يبدوني
يظهر ازريجا وكرزاني=وكل نبتٍ يظهر بلوني
جود من الظفره إلى عماني=دار بو سلطان تكفوني
لي نهي هذا بدا ثاني=والمغادر ما يحفّوني
ذاك عيد البدو لي زاني=مثل عيدٍ به يسعدوني