بديت في مستظلّي =رزمٍ يسموه نايف
ودموع عيني تهلّي=من فوق خدّي ذرايف
أبكي ولا حدٍ فطن لي=والقلب من الهجر صايف
اذكرت ديران خلّي=من يوم حنّا ولايف
دارٍ عساها لمهلّي=اللّي مزونه ردايف
يسقيه وسمي وعلّي=وقت الشتا والمصايف
صبرت والقلب ملّي=من طول فرقا الولايف
ان كان هالشهر هلّي=ما شفتهم والحسايف
وقتٍ تقضّى وزلّي=والوقت هذا صرايف
يا صاحب الخير قل لي=يا بو حسن شِ انت شايف
أعنيك وانته اذهن لي=عن لا تعرف العرايف
في الدار أحيدك تدلّي=واريد منك السعايف
حالي غدا مستعلّي=ووصولهم بالشّفايف
أبعد ولا له متلّي=والرمل دونه رضايف
با جيه لو أنا ما دلّي =من البعد ما نيب خايف
ماريت غيره مسلّي=قلبي من الغير عايف
إن كان شوفه حصل لي=ما اريد غيره ولايف
ياللي نظرته شفاً لي=سيد العذارى العفايف
سيره جداهم هوىً لي =من فوق زين الوصايف
حيدٍ على منوةٍ لي=ما فوقه إلا خفايف
يا زين وهوه مفلّي=في وسط ذيك الكفايف
وديارهم قد نزن لي=اهل القلوب النظايف
وابعدت من ذا المحلّي=لي ما عليه الحسايف
سجنٍ على غير دلّي=ترضى به الاّ الخلايف
والاّ الصقر ما يذلّي=أهل النفوس العنايف
طلبت لي ما يخلّي =منشي المزون الردايف
عسى ان داره مهلّي=في البرّ ولا الخرايف
وعلى محمد أصلّي=أعداد ما طاف طايف