أنا البارحة ما غضّت العين يا ذيبان=سهيره يلين الصبح بانت مواريه
وهيّضنيه صوتٍ تجرّه وزين الحان=عسى الله يجيرك م الهوى من بلاوّيه
بلاني كذلك يوم أنا بالهوى طربان=ولا اعرف حسناتي ولا احاسب السيّه
واليوم شِبت وتبت يالله بالغفران=وجنّبت طرق الغيّ بالكوف موليّه
ولا ابغي الهوى يا غير شفّي مع البدوان=لي يسكنون البرّ ما هوب حضريّه
عسى الله يسقي دارهم مرعدٍ دنّان =ومن عقب فصل القيظ تسقيه وسميّه
زمان الصفاري يوم نجم الوسامي بان=سهيل اليماني لي ظهر زانت النيّه
ويا زين شوف البيت خايعٍ مليان=من العشب قفرٍ ما بعد جاته رعيّه
ودقّق طنوبه لي نزل مالي الذرعان=حسين الطبايع بو عيونٍ ذبوحيّه
بروس المفالي عقب ماشدّ م المقطان=شربه غدير ومن شهر قاطع الريّه
ويا ما حلى صوت الفحل لي ضوى مسيّان=وشوف العشاير بين حمراً وحزميّه
وفيهن مغاتيرٍ عرابي لهن ألوان=شقرٍ وسحمٍ بين صفراً وخمريّه
ومن فضل ربي ما يواتن على الحيران =عليها الشحم مثل المقاصير مبنيّه
ولا تنعقر حيرانها غير للضيفان=وللي كلامه ما تغترك معانيه
يلي من بدا له شف ما يشاور النّسوان=يقضي لزومه يوم بيجيه عانّيه
مترى المراجل صعبةٍ والهوان هوان=ودرب المراجل هوب سهلة مراقيّه
يراقيه لي ما يحاسب الربح والخسران=ورزقه على اللّي يخرج الميت من الحيّه
هو الواحد اللّي خالق الانس ويا الجان =متكفّلٍ بارزاقهم ربّ لبريّه
واختامها صلّوا على صاحب الإحسان=شفيع الملا في ساعةٍ هوب مرضيّه