إذا هبّيت يا شرتا المغيبي=خطر (( ع )) البال ذكرٍ لا يغيبي
أناحي نوح راعبة الحمامي=وعيني دمعها دايم سكيبي
سكبت الدمع (( ع )) الوجنات جاري=على فقد الأخلاّ واهل داري
يحقّ انّي ألاطفهم واداري=مداراة الجريب الى الغريبي
غريبٍ في حما حيٍ وديره=أنا عنهم بدار و هم بديره
وحايرة فكر قلبي كيف اديره=شرى اللي بايتٍ روحه عريبي
غريبٍ عن معازيبي وناسي=وخلاّن الصفا ليّ وناسي
اراعي عهدهم ما هوب ناسي=مراعاة الثريا للرجيبي
أراجب للرضا وارقب نباهم=وعيني دايمٍ تربا جداهم
وقلبي حن مشتاقٍ يباهم=حنين الذود والخلي النجيبي
جبرني حبّهم جبر الكلايف=وكثر الصبر كلّفني كلايف
وانا مجروج من هجر الولايف=نحل حالي وخلاّني صويبي
مصابي من هجر حلو الدعايا=ورسم الحب شيّن بي وعايا
إلهي تستمع مني دعايا=توصّلني إلى دار الحبيبي
حبيب اللّي بقلبي له منازل=بعيد الدار عن هذي المنازل
وحالي من فراقه في تنازل=سجيمٍ علّتي تعيي الطبيبي
طلبت الله يرويني عيونه=عقب لفراق وارقد في حظونه
حبيب القلب انا مايوز دونه=ولا لي حد من دونه طليبي
طليب الروح هو مضنون عيني=ولا بيجوز لي غيره ظنيني
تملّكني بمعروفٍ وزيني=ثمان سنين عاشرته بطيبي