تيّمنّي يا علي خردٍ لفنّي=زايراتٍ ولّعنّي بالمقالي
بالسلام و بالتحيّه بادرنّي=من قبل لا جيب وراد السوالي
باشرنّي بالتعطّف و التّأني=واجلسن عندي يلين العود مالي
كل ما ردّت انتظر فيهن غشنّي=نور شمس ونور بدريّ الكمالي
يوسفيّات الحسن حمر الوجنّي=سيّدات الفن ربّات الجمالي
أحوريّاتٍ زواياهن تبنّي=من عبير المسك فوق الخد سالي
سامرنّي يا ملا في كل فنّي=وذبحنّي بالتدلّع والدلالي
وشغلنّي بالحكايا وملكّني=ملك عبدٍ في أمرهن لا يزالي
حار فكري يوم هن بيوادعني=ألتمح من زولهن لمح الخيالي
قلت ريضن يامهايا وأنّسنّي=قالن اسمحنا ترى ضاق المجالي
وان فرغنا بانعود وبانثنّي=وانتظرنا عقب أيام و ليالي
يا ملا يا ليب بيفيد التمنّي=ياتمنّاهن يصورن لي حلالي
طول عمري ما بانوح و لا باغني=بأندمج في حبّهن في سيح خالي
لكن ظروف الليالي عاكسنّي=والبخت والحظ سعده ما صفى لي
يا ملا كاس المرارة جرّعنّي=وارتشفت الصبر كنّه قند حالي
والمحبّه للفتى بأخلاف ظنّي=كم غريمٍ في الهوى حرم الوصالي
كم بكيت و كم انوح وكم احنّي=كم صفقت الكف فوق الكف خالي
هايمٍ في الحب ما تدرون عنّي=عن هوى الخلاّن قلبي هوب سالي
نجمتين وظبيةٍ ترعا السمنّي=زعفران وحيّةٍ صادت غزالي