شيخ دبيّ الحبيبه=راشد عمار الدار
الله عطاه الهيبه=والمجد والعتبار
نفّذ خطّه عجيبه=تقصر عنه لنظار
أرضى الولد والشيبه=كبارنا وصغار
كلّ حصّل نصيبه=من مجلس الأعمار
عطيّه له وهيبه=من فضل راعي الكار
الشيخ لي نسمى به=إلنا ذرى وحظار
في الضيجه نحتمي به=عن سطوة الأشرار
شوفوا بعد ترتيبه=مينا الجبل وش صار
تكون في غبّيبه=في لجّة الأبحار
والسفن لي تذريبه=يازم عليها حظار
الخب ما تدري به=طروح في بندار
هذه افكار مصيبه=من فكرة الاحتضار
أسمي شيخ العريبه=ما حد مثله صار
كلي شيء يعتني به=لازم يازم عمار
حتا صارت جريبه=وصّل إليها القار
لوّل حتا زريبه=حظار داخر غار
بين جبلين مصيبه=لا دار ولا مدار
واليوم صارت ريبه=فيها البنايا كبار
فيها النهر تجري به=والسد والأزهار
والكهربا تصري به=سدّ جرى بأنهار
عقب أمّا هي عزيبه=اليوم صارت دار
للناسمه جذّيبه=ريفٍ ولا شي غبار
يا عالمٍ بالغيبه=يا رب يا ستّار
تجل شيخ العريبه=من اطوال العمار
دعايه تستجيبه=طالبك يا غفّار
شيخ دبي الحبيبه=راشد عمار الدار