مالوم نفسي في الهوى متعلّله=عافت لذيذ الزاد ما تهنابه
والعين عيّت عن مطاييب الكرى=جفني لذيذ النوم ما غظّا به
أبكي حسف من غبنتي في مهجتي=لي من شربت الما القراح أحزى به
والقلب مجروحٍ تردّد زفرته=شطّه غرامه والحبيب اسبابه
خذني هواه و لا رحم حالي ولا=راف بغريم الشوق من تعذابه
برّق بعنيه و جرحتني نظرته=تيّم فوادي ونهبه واقفى به
بو غرّةٍ تسفر كما بدر الدجى=ومجدّلٍ فوق المتون أومى به
وحياي مقرونٍ وخد يلتظي=ياظي شرى شمس العصر جلبابه
والخشم سلّة سيف هنديٍ لمع=والعين عين الريم في معزابه
والجيد من جيد الوضيحي له مثل=ونهود في صدره تشيل ثيابه
والقد مملايٍ و خصره معتزل=والردف نابي عاليات حيابه
لي من مشى مشيه شرى مشي القطا=توح جدمه ويزين به مسحابه
هو منوتي وهو سبايب علّتي=قلبي تولّع به و هاض إمابه
والحب جبّارٍ سبتني ليعته=ماجور صبّ يا ملا يبلى به
لي ما طعم ذوق الهوى ما ينهوى=ولي ما عرف للحب يترك بابه
جرح الهوى فيه الجوى ماله دوا=لو عالجوه اهل العرف ما يابه
وانا جروحي في فوادي مدمله=مضروب في وسط الحشا بنشّابه
عوقي غبي وأعزى عتيج يثيبني=عساه يسعدني برد جوابه
حيث ان شعره يا فتى ما ينقصى=والحب نور ودارسٍ في كتابه