هلا بحبيّبٍ مضنّى=عدد ما رنّح الغصني
قدومك به تشرّفنا=وسعد الحظ وافقني
وبوصولك تعرّفنا=ولو ما كنت تعرفني
من أخلاقك تشكّرنا=ومعروفك تملّكني
جمالك باهي الحسنا=وميدولك على المتني
و من عينك تصوّبنا=وتصويبك يعوّجني
ومن خدّك تعجّبنا=يشابه بارج المزني
وفي صدرك بعد شفنا=شرا التفّاح في الغصني
وخصرك هايف البدنا=شكى م الردف يتعبني
وقدّك مالي الغصنا=غضيضٍ كامل الحسنى
بشوفك خاطري يهنى=ومنطوقك يأنسني
غرام الحب هيّجنا=على شوفك وتيّمني
أحب انّك تلاطفنا=و بالمعروف تاخذني
من احسانك تواصلنا=ولا تنسى و تهجرني
ويوم انته توادعنا=ترى ضيّعت لي ذهني
أنا مجروح في وهنا=وجرح الحب يحرقني
أنا وادعك باليمنى=وقلبي ممتلي حزني
أخاف انّك تقاطعنا=وفي بحرك تغرّجني
عسى الله ما يفرّقنا=وربّي ما يباعدني
وكانك تعرف المعنى=معيشة يوم ما تغني