على بخت من بيعود له بعض ما راحي=ليالٍ تقضّت بالتزخرف والافراح
أيام سعدٍ لي بها الإنس والهنا=على عشره وناس ومع كل مزّاح
وعشنا بها في غاية الإنس والطرب=ثلاثين حجّه مع مناعير وسلاح
فلا خلطنا هندي ولا جارنا الردي=ولا زارنا حدّ من الغرب سوّاح
ربينا على عشرة كرامٍ نعدّهم=ظراغيم قومٍ شانهم ماله كفاح
هذا أخو هذا وهذاك شفّنا=وهذا بني عم ورفيجٍ ونصّأح
حرارٍ سمو في ذروة المجد والعلا=ربوا في ظهور الخيل صبحٍ ومرواح
وهجنٍ جنوهن لا بتي للّوازم=حموا حيّهم عن كلمه اللوم واللاّح
ومجالس للضيف عادات مجدنا=بنوهن كرامٍ ما بغن لك مفتاح
يشرع بهن من جا من البعد جايع=ويمسي عقب صوعه أمينٍ ومرتاح
ونصبح مساير مع اشراف حينّا=ونمسي نغنّي مع خوندات الاملاح
ولا فكرنا ان الليالي تضدّنا=ولا ظننّا ان الرسم ذاك يمناح
وآخر تبدّل عصرنا ضد مجدنا=وجتنا ليالٍ كدّرت ذيك الافراح
ودشّت الاجانب في حمانا ونفّذت=أمورٍ فلا تنظر بها بعض الاصلاح
لجوا من ديار العسر وألفوا بدارنا=من كل فجٍ جوا على حسب الارباح
جماهير غوغا ساقهم حادي البلا=من كل سلاحٍ ومن كل قلاّح
حلّوا علينا كالجراد المنشّر=يرعون في روض المسايل والابطاح
وحازوا وفازوا ثم ساسوا وزحزحوا=أهل الوطن واهل الأماكن تزحزاح
وصرنا نقلدّهم على الرغم منّا=ونتبع أوامرهم ونصفق لهم راح
من عقب ما يتجنّد الأب بندقه=مع خنجرٍ يعتادها تحت لوشاح
إبنه تجنّد بنطونٍ مرنّق=وقميص من نوعه في الحلج طلواح
وان قلت له يا ولد هذا يعيبك=قال انت متأخر ووطرك بعد راح
نحنا شباب اليوم في غي عصرنا=مثقّفين وكلّنا نشرب الراح
يَ اهل الايمان ويآهل الدين والتقى=ويَ اهل العقول اللّي تعرف النواحي
وين الاسلام وويّن باقي شروطه=وين الزكاة اللّي نفقها مباح
وين احميّه والشيم والحماسه=وين العدالة والاحكام والاصحاح
قلّت حمّيتنا ولا عاد عندنا=إلا المطامع واكتساب الارباح
يا ويلنا في يوم نشقى ونلقى=أعمالنا مكتوبةٍ في الالواح
لي ينعطى كتابه بيمناه ناجي=ولي ينعطى كتابه بيسراه طاح
ومن التخوّف شاخصاتٍ ابصارنا=وعيوننا كد صابهنّ اللحاح
ما نرتجي إلا شفاعة محمد=والعفو من خلاّقنا والسماح
والختم صلى الله على هادي الملا=شفّاعنا يوم الحشر والصياح