قصيدة ( من ضميري )
شاعر : سالم محمد الجمري

من ضميري دار دولاب المثل=شفت ظبيٍ يا ملا ماله مثيل
هو خشف لو سولعي والا وعل=لو دماني فز من عقب المجيل
هو شعاع الشمس لي بدرٍ كمل=لو ضيا جنديل ومسوّى شعيل
إلتمحته من ورا ذاك الغتل=وابتّهت عقلي وضيّعت الدليل
خزّني بالعين عنّي ما يفل=صابني في القلب وادعاني عطيل
والله انّي من صوابه في وجل=آنس فوادي تعلّق بالشليل
جاعد النهدين والوجه اكتمل=هايف الخصرين والمضمر نحيل
ليت من شلّه وقفّا وارتحل=في خطات الجيب لي ماله مثيل
مر به لقرن وع البطحا نزل=والفلي والذيد مرّن وقت ليل
داس به حمده وجريان السهل=في المدام اصبح وقيّل به مجيل
والعصر روّح وسيره معتدل=يمشي براحه وفايز بالخليل
عن طوي لحصون ينّبت المشل=قاصدٍ سيري على مطلع سهيل
جيت بالمركز ولا عندي حمل=غير مضنوني شرا ظبي المسيل
شافه المامور وآزم مختجل=قال روّح به عسى عمره طويل
مر به زاخر على ذاك الرمل=مالك معارض على هذا السبيل
دست بتروله وفي الحال اشتغل=يوم طاح السيح سّوى له كويل
صعرا والعين قصدي والأمل=دار بو سلطان كسّاب الجميل
بـ التجي بالكاس بدّاع المثل=سالم الشاعر وهو نعم الزميل
قام بالواجب ورحّب واحتفل=حطّني في وسط غرس وفي ظليل
واستراح القلب من عقب الوجل=في محلٍّ لا حسود ولا عذيل
نلت مطلوبي وكل شيءٍ كمل=والختم صلّوا على طه الرسيل


قصيدة ( مرحباً باللّي تّعنا )
رد الشاعر : سالم الكاس

مرحبا باللّي تعنّى وارتحل=فوق م الجيبات بو حجمٍ طويل
روّحه من بر ديره بالعجل=مرحبا به عد ما وبلٍ هميل
شل مظنونه ب نيّه واحتفل=سالم الجمري في مرضاة الخليل
روّحه لعصير والسايق يدل=والحمل في الجيب بو طرفٍ كحيل
أعفر الوجنات تل القلب تل=لي دعا الجمري من فواده عطيل
مر به لحصون والسير ابتدل=ما يصيح الكير فيده مستحيل
وصّل المركز ووقّف وامتثل=ينتظر منّه الاشاره للرسيل
شافه المامور ومن نوره ذهل=واندرى حاله شرى لون البتيل
واسمحوا له بالمرور بلا سول=من جدا المضنون لا تشكي عضيل
دوّسه زاخر وعشّق له دبل=كامل الآلات لو ما صاح ويل
بالكرامه والفراش انواع زل=يجلس الجمري ومضنونه عديل
في فرايا عمان يالجمري نزل=في حدود العين منسوع اليديل
يا ربا دارٍ هواها ما يمل=دار من يعفي عن الذنب الثجيل
دار آل نهيان يا صخر الجبل=شيخنا زايد عسى عمره طويل
ما يخون العهد و بالله اتّكل=معتصم بالله يا نعم الوكيل
وانا يالجمري ترى حالي نحل=مثل ما صابك وانا قبلك عليل
إنته الربحان لي قلت المثل=عند بن روغه ولي مثله نجيل