من غرامي زايد هيامي=بالمنامي ما غضت عيني
حب خلّي رضرض عظامي=شطّني سيد المزاييني
لي دعاني مولعٍ ظامي=من ثلاث سنين يمنيني
جارحنّي والجرح دامي=ذابحنّي ذبح سكّيني
أرضف الونّه من اسقامي=واصفج اليسرى على يميني
قلت له يا سيد الآرامي=ليش ما تحرم وتسجيني
من شفايا ذبّل انعامي= مزّةٍ م الريج تحييني
شوفني ذايب من العامي=كن فيّه وجعة البيني
عايشٍ ما بين الاحلامي=في الخيال مقضّي سنيني
قال لا تفضي بالعلامي=ي المتيّم يوم تبغيني
ريض وابعد عنك الاوهامي=واكتم سدودك عن تبيني
وان صفا لك حظّك وقامي=بايولّف بينك و بيني
والمحبّه عند الاحشامي=لحترام ونظرة العيني
قلت يا منقوض الاوشامي=عنك ما يهنيني الظيني
يوم ما بأنظرك جدّامي=أستوي عاشق مجينيني
مغرمٍ وجروحي جدامي=وانت غيرك من يداويني
عنك ما شلّتني عظامي=يا حبيبي لا تخلّيني
ضايعٍ متبايعٍ عامي=في هواك ولالي معيني
روف بي لا تنقل آثامي=خذ ثوابي يا المضينيني
إنت سيّد والا انا غلامي=منك حقّي من بيعطيني