قصيدة ( نهار ما قفّوا )
الشاعر : سالم محمد الجمري

نهار ما قفّوا من دبي=حمّلت مالا حمّلت روح
وآزمت لاميّت ولا حي=على وساد الحب مطروح
يلومني لي ما درى بشي=وانا بحسايس سبعة جروح
قلبي معوّق في هوى الحي=والجرح فيّه لاحق الصوح
لا اهيع ولا اتلذّذ ولا ابهي=كنّي غريقٍ في بحر نوح
أبكي فراق الخل وألعي=نوح الحمام اللّي على الدوح
ويلي على بوجادلٍ لي=ترف الصبا بو صر مسطوح
لا هند لا ليلى ولا مي=مثله ولا يخلق بشر روح
موادعنّه يوم ينهي=موادعة راضي ومسموح
لكن عقبه وين بسلي=يا عبيد دمع العين مسفوح
كانك خويّي بأتبع الفي=بأسحب على الرسته وباروح
بنسير صوب عمان نمشي=حافين بين رمال وسيوح
هناك وين القلب يبهي=وين السمنّي ايبّن ويفوح


قصيدة ( أهلا هلا بك )
رد الشاعر : راشد بن حريز

اهلا هلا بك حي بك حي=لي ما عنيت بدار مسموح
ما دام قول الحق يرضي=خل العتاب وياك مشروح
عارضت لو ما قلت لي شي=باب الشعر من خلق مفتوح
الانسان ينصى وين يبغي=لو بالسلام يمر ويروح
ليتك بقيتا في محضه شوي=لابد لك في الوصل مربوح
بوصيك لا تلعي وتبكي=كثر البكى لك هوب ممدوح
على عشيرٍ عنك مجفي=ما في المجفّي ينفع النوح
أحسن يلو ما دمعك يسي=هذا كلامٍ ياك موضوح
لي ما يزور الحب هب حي=مثل المجمّد لي بلا روح


قصيدة ( أهلا عدد ما غنّت )
رد الشاعر : سالم محمد الجمري

أهلا عدد ما غنّت عدي=على غصون البان وتنوح
خطٍ من محبٍ مسمّي=رحّبت به والقلب مجروح
يشرح تماثيله ويعني=فن العنا والعطف والتوح
يا منادمي ماعنك مخفي=هذا سبيل الحب موضوع
وين الجميلي فنّه يغنّي=والليّ مصوّب لازم ينوح
أنا مثلهم في الهوى الغي=غرقان ومسمّر على لوح
لا تلومني لي قلت بابكي=حبّ الغواني يتلف الروح
وان سلتني عن ديرة الحي=وين الفلي يجري ومفتوح
تعني محضة ما مثلها شي=فيها غدير الغرس والدوح
فيها ولد سالم الشميمي=لي من لفينع دوم مشروح
شيخس يرحّب يوم تلفي=وجهٍ فليح وفعل ممدوح
عسن ان سحب الغيث يسقي=على وطنه وتسيل لبطوح