هاض ما بي من تصاويب الولع=يوم جن الداج والخالي هجع
بي هوى خلٍ مليّع مهجتي=ناح به قلبي على فنّه سجع
سجعتي سجعة خلويٍ للجنين=ضايعٍ متبايعٍ قلبي حزين
كاليتيم اللّي تلاداه اليدين=وامحنه لفطام من بعد الرضع
رظرظ عظامي هواه و شط بي=صاحبٍ جرحه على قلبي غبي
آه لو تدرون باللّي حلّ بي=كان ما لمتوا فوادٍ منقطع
إنقطع درب الوصل قد له زمان=ما نظرت حبيّبي دعج العيان
ما علم به راضيٍ والا زعلان=يا ملا وش لي حدث به و امتنع
إمتنع والقلب ما يسلي عنه=علّل فوادي فراقه وامحنه
شاملتني في الحشا زرق طعنه=يا ملا وآنست في قلبي وجع
وجعتي في القلب من زود الغرام=والولع خلاّ فوادي مستهام
والمحبه إحكمتني بالاعدام=من غرام الحب داخلني فزع
زرع قلبي هاف ماحدّ سقاه=وش حياة الآدمي عقب اصدقاه
صدّ بي والقلب ما ينقل عزاه=من افراقه كن في صدري فشع
اشعر بليعات وجدي في الضمير=وآنس فوادي تعرّاه الفرير
من سبايب علّتي جرحي خطير=لو وقع في وسط جلمودٍ نصع
صاعني صوع القصا حب الظنين=أقرن الحيّات وضّاح الجبين
بو خدودٍ كنّهن لمعة لجين=والخشم كالسيف والمنحر دلع
بالتدلّع خذ فوادي وملكه=في وسط غزله لواه وشربكه
لو بغيت اسليه روحي و اتركه=لجلج فوادي بحبّه و افتجع
والف صلّوا عد ما هب انتسام=أو عدد ما لاح برقس في غمام
ع النبي المختار شفّاع الأنام=سيّد الكونين يهدي من تبع