هب النسيم وذكّر القلب ما طاف=ليالٍ مضت لي مع حسين التواصيف
بها نلت غاياتي وشفّي م الاولاف=وشفت الذي في شارع الغي ما شيف
واليوم كدّرني زماني بالخلاف=تنّوع وفرّق بين شمل المعاريف
وظليّت محزونٍ بهمّ وتحسّاف=ودموع عيني فوق خدّي مذاريف
من عقب مانا مشيتي بالتغرياف=قلبي بميدان الهوى شاربٍ كيف
واليوم كنّي بي سقم سم الاتلاف=ألعي كما ورقٍ لعى في المشاريف
وآون ونّاتٍ خفيّات وارضاف=لي من تذكر خاطري قلت يا حيف
على وليفٍ في الملا ماله اوصاف=خلٍ بحبّه كلّف القلب تكليف
بوجادلٍ كالليل سافٍ على ساف=وحيّات سمرٍ في جبينه معاطيب
وخدود عفرٍ كنّهن برق رفّاف=مع وجنتينٍ كالدرور المقاصيف
يلي برّق بعينه جرح قلب من شاف=من سحرها شطّف لوادي تشطّيف
واللّي تبسّم عن ثمانٍ له اوذاف=كالجيون اللّي في عقوده مصافيف
مع شفتينٍ له تهاياهن ارعاف=عذب اللما يحلا بهنّ الترشّيف
ألذ واحلى من طعم كل قرقاف=واخت وانوج من شذى المسك لي ديف
ومعنّقه عنق الوضيحي يلي شاف=زولٍ يذيره واختفى منّه مخيف
والصدر كالجنديل بالنور كشّاف=ونهود زمّنّه ضغارٍ مواجيف
نابي ردوف وناحل الخصر هيّاف=كالبان عوده لي مشى بالتغرييف
خذني بحبّه عن هوى جمع الاولاف=وتيّم غرامي بالتولّع على الكيف
ياما سقاني من لما عذب الأرشاف=ريجٍ كما الزبد الذي بالعسل ديف
وياما تلاقينا على راس مشراف=وياما تعاطينا عهود و محاليف
لاخون في عهده ولا هو لي يعاف=عشنا كما الطيرين كنّا مواليف
واليوم عنّي صار له حجز و اصداف=ناسٍ سعوا له بالدعايات و الزيف
حتى امتنع عنّي ولا عاد ينشاف=حالي تغربل م العنا والتحسّيف
أزقر و أنادي ياهل الجود لشراف=وأعزى حمد من زد كل المعاريف
الشاعر اللّي يضرب القاف بالقاف=اللّي مرّمس فايجات الغطاريف
عساك تسعدني على بعض الاهداف=يا ذخرةٍ لي يا صدام المناكيف
إترى الحميّة عند فردٍ م الاولاف=ما تنلقى في غير اهلها يَ عرّيف
والختم صلّوا عد ما هبتّ ارياف=على نبيٍ خصّه الله بتشريف