هب النسيم اليماني=والنوم فارق عياني
واتذكّر القلب خلّه=والنوح كثره شجاني
يا شيب عيني و راسي=من هجر خلّ جفاني
عقب الموّده تنكّر=في بحر غيّه رماني
قلت العفو يا حبيبي=ما اطيج هجرك تراني
أنا بحبّك متيّم=وانتّه بعد ما تباني
ذلّيت نفسٍ عزيزه=عذّبتها من زماني
ونسيت وطرٍ مضى لك=يوم الفرح والتهاني
عليك ذنبٍ من الله=إن كنت ما تهتواني
والله لو ما ودادك=في القلب شيّد مباني
ما كنت اعرف المحبّه=فيها الشقا والهواني
لكن حبّك جبرني=والله بحبّك بلاني
لان المحبّه بتجرح=كل واحدٍ مولعاني
وين العقيلي ومحسن=ماتوا بحب الغواني
وانا مثلهم معنّى=والحب جرحه سباني
أجاوب الورق و ألعي=واصفق براح البناني
على حبيبٍ فتنّي=ماشي بقلبه حناني
لولاه ما كنت اغنّي=ولا بدعت الأغاني