البارحه هبّت هبوب الصبايا=وذكّر فوادي ماضيات القضايا
واطرت على بالي خيالات خلّي=اللّي سلب عقلي وتيّم هوايا
حتى اهملت عيني على الخد واذرفت=بالدمع وارّقت الملا من بكايا
وآون ونّة مدركٍ هاله البلا=ونّة صويبٍ في حشاه برمايا
فلا النوم لاق بمقلة العين واذهلت=ولا الكبد يهناها لذيذ الغذايا
من حسرةٍ باقصى الضماير تواقدت=كما يوقد المريل بنار الغضايا
على فقد مضنونٍ ضنا الحال واحتجز=بأقصى ضميري منزله في العلايا
ولابي قصورٍ دون ربعي ولاعيا=ولكن بي بسمات عذب الثنايا
وبي نبل نشّابٍ وقوس الحواجب=وبي دجى ليل من ليالي البقايا
وبي يا عجيد الراي قلبٍ تبدّد=ودّعت نفعه يوم عسف الحنايا
ألا يا شعرا المجلس ويا لابة الوغى=ويا نجدتي إنتوا مقام الحمايا
ثيبوا على صبٍ شكى الحال واشتكى=لاهل الحماسه والربوع البقايا
ما خص حد وحد منكم على السوا=تكفون وانتم فاهمين الشكايا
منكم من ملازم على كل واجب=ومنكم شميميٍ يقود السرايا
ومنكم من يغنّي على منهج الهوى=ومنكم من مرمّس غضيض الصبايا
واللّي سلك في منهج الحب وابتلى=ما ظنتي تخفي عليه الخفايا
أروي لكم الاعراب عنّي وما جرى=بالعون ثيبوني ولبّوا ندايا
ولي ما يثيب الحال في حالة الندا=هذاك يحسب من بقايا الرزايا
وانا احتسب منكم و فيكم وعزوتي=جميع شعرا اللّي هم حضورٍ ويايا
ماحد منكم يا رباعه يدلنّي=لو بالمثل وإلا بنطق الحكايا
وانا اخترت بعد حبيّبٍ لي على الرضا=وانا شربت من فرقاه كاس المنايا
شفقني هوى من زانها النوع والمثل=كما لون شمسٍ كوّنت في سمايا
رعبويةٍ من خرّد البيض كاعب=عيونها تشبه عيون المهايا
مصيونةٍ عذرا بها الحب فتنه=عفيفةٍ ما دنّست بالخطايا
تشفي جريح الحب لي من تبسّمت=عن لولوٍ مكنون بين الشفايا
لها وجنةٍ كالخد والخشم صيرمي=تشوق النواظر بالحسن والبهايا
مملاية الأطراف والساق دملجي=واقدامها اوذافٍ تجر الخطايا
واتلى صلاة الله على طه النبي=شفاعنا يوم البعث والندايا