قصيدة ( هذا الشهر )
الشاعر : سالم محمد الجمري

هذا الشهر لي نرقبه هل=لي قلت فيه اصبر إلى الحول
الشهر كمّل والوعد زل=والهجر قام يزيد ويطول
يا شوق يا معشوق ياخل=يا من بحبّه صرت مشغول
تلّيت قلبي يالضنا تل=واعديت عقلي عقل بهلول
لا ابهي ولا اتلذّذ ولا اذهل=كنّ الضمير يلاشظ بدور
صابر وقلبي م الصبر مل=أبكي حسف والدمع هملول
من ليعتي كم باتحمّل=كتمت وآخر قلت لاحول
لي حلّ بي لو في جبل حل=اتكسّر وذاب وأصبح رمول
إنت ابسعه وآنا معلّل=واللّي نظرني قال مسلول
ورباعتي قالوا مبدّل=واليوم ذا ما يفهم القول
الحب خلاّني مهبّل=خذني هوى بو زلف منشول
بو حاجبين وطرفٍ اكحل=ومهنّدٍ كالسيف مسلول
والخد فوعة وردٍ مطل=أدعج غنج نهّاب لعقول
عذب اللما سلساله أعسل=وشفٍ تشافي جسم معلول
والصدر كالديباج واشكل=ياضي كما الجنديل مصقول
خذني هوى حبّه عن الكل=واسهى بيه عن العرب مول
كم مرّةٍ جيته أتسوّل=وهو يماطلني بالوصول
وان قلت شي اخاف يزعل=يا ناس انا ما اعرفت شاقول
يا الهاملي فيّه تجمّل=وافهم جوابٍ ياك مرسول
شكواي من بو مجنعٍ هل=وارجوك ترجع لي عبا القول
والختم صلّوا عد ما هل=وبلٍ سفى جريان وسهول
على نبي الله الأكمل=الهاشمي بالوصف مدلول


قصيدة ( حي الجواب )
رد الشاعر : أحمد بن خليفة الهاملي

حي الجواب اللّي مرتل=وآيات من لي يعرب القول
حيّه عدد وبلٍ وماهل=من سود سحبس في السما تيول
ياني وانا مثل المغفّل=سالي عنه بأعمال مشغول
لكن بالواجب أعجّل=بالرد حق الصاحب المول
لي يشتكي به صد من خل=ويقول كمّل بالجفا حول
من صاحبٍ ما راحه وحل=ولا رحم حاله بـ لوصول
يا بو حمد ياكم من خل=أجفى الخليل بكثرة القول
واليوم أرجو بالتفضّل=بأنبيك عن لباس لحيول
يبغي صبر وايامٍ أطول=كم غربلن قبلك من فحول
سلطانهن جاير ويذهل=عن الجدا سلطان لعقول
وانا قبل مثلك بيه حل=واتعرّضنيه في الكوى كول
من صاحبٍ بالهجر علّل=حالي و من فرقاه معلول
بويادلٍ شاقر معشكل=الّي على المتنين مسيول
يطلى بطيبٍ بنّته فل=ومن الشمطري دوم مبلول
بوخدّ برّاقٍ ترسّل=فيه الحواجب سهم مسلول
بو مضحك ياضي ويشعل=به در، به لولو، به عسول
والآن ما يرحم ولا يحل=قيد الهجر عنّي ب لوصول
وانا عن الشكوى بمعزل=حوف الوشاة وتسمع عذول
ولا أنادي به وادلّل=جاعل طريج الود مجهول
وان كان بالجمري محلّل=الهاملي في الحب مقتول
وانا لشانك باتجمّل=وامّا تبى دعواك منقول
حقّك بجيشٍ دوم يشمل=مدّرعات البر واسطول
فيهن سريّه رقم لوّل=وبها الولد قايد ومسؤول
هذيك حقّك ب تحوّل=وتبقى على حسابك على طول
تاصلك خلّك لو بيزعل=وتبلغ مناك وكل مامول
وارجو العفو كان الغلط دل=منّي وبالسمحان في القول