هل الدار ليت القلب من ليعته سالي=وليت المحبّه ما اخطرت لي على بالي
سبتني وخلتني غريمس متيّمٍ=أجيب الصدى الصادي على غير منوالي
وطيب الكرى عيّا يوالف نواظري=ونفسي فلا يحلى لها لذّة الحالي
خليعٍ مليعٍ في حشا القلب غبنتي=ومن مقلتي دمعي على الخد همّالي
على من عنيته واعتناني بودّه=حبيبٍ سلب عقلي و سبّب على حالي
سقامٍ وتعليلٍ وضيجات حسره=تحمّلتها وخفيت بما جرى لي
من فراق مظنونٍ ليا في ضمايري=سكن واحتجز في مهجتي منزلٍ عالي
إذا دار تذكاره على القلب صابني=من الوجد ولوالٍ على القلب ولوالي
ولي هب نسناس الصبا من دياره=أسايل لها عنهم عسى حالهم حالي
حيث ان في ملياه ماحد إلتيا=مبانيه في قاصي حشا القلب نزّالي
ولونه كلون البدر لي يبهج الدجى=غنوجٍ غضيضٍ أدعج العين غوّالي
وزلفٍ على متنه يثيلٍ ومدهم=كما فاحم الظلما وسود الليالي
وخدّ تشعشع واللما يبري الظما=وثغرٍ تزاها به عقود اللوالي
والصدر كالديباج لمّاع نوره=ونهود زمّنّه كما وصف فنجالي
وخصرٍ كما خصر الرشا أهيف الحشا=يلي من مشى تلّنه ردوفه اثقالي
خذني بحبّه وابتلاني وعقّني=طريحٍ جريحٍ ما تلطّف على حالي
فما فوق ما جلّدت نفسي على الصبر=واخفيت ما بي عن حسودٍ وعذّالي
ولكن طول الهجر بيّح بما خفى=ودعواه سبّتني على بدع الامثالي
وخلاف ذا يا طارشي قم ترحّل=واوصل الى طنّاف وافسر له الحالي
قل له خويّك يشتكي لك ويرتجي=عبا منك لنّك فاهمٍ قول الامثالي
وخويّ على الشطّات ما ثاب يا فتى=هذاك ما يحسب من الناس الاشبالي
واشرف صلاة الله على سيّد الملا=محمد شفيع الخلق في يوم الاهوالي
مع الآل والاصحاب ما قال مولع=هل الدار ليت القلب من ليعته سالي