قصيدة ( هيّج افكاري )
الشاعر: سالم محمد الجمري

هيّج افكاري ناسمٍ هب نسناس=يوم الخلايج ذاهلينٍ مناعيس
بت بوزا كنّي على كور حمّاس=بنٍ وقلبي في فكور وهواجيس
ما لذ لي نومٍ ولا طاب لي كاس=من ليعتي قلبي بداه التوسويس
أبكي حسف من ليعتي والتنفّاس=كنّه على صدري مركّب جبل قيس
والدمع من عيني جرى ماله قياس=سال وسقى دمعي بكاسٍ مغاريس
متولعٍ في حب مدقوق الالعاس=خلّ بحبّه يا ملا حاسني حيس
شط بحشا قلبي وخذني عن الناس=ما راف بي طلمس فوادي تطلميس
لانّّه فريد الحسن ما مثله اجناس=حاز الغوى عن من زهن بالملابيس
بو جادلٍ كنّه دجلى ليل عسعاس=وحيّات كالدالين سمرٍ مقاويس
والعين سودا كنهّا عين جرناس=من سحرها كم عاشقٍ كد غدا ليس
وخدود عفرٍ كنّهن لمع قرطاس=مع وجنتينٍ لامعات الملاميس
واشفٍ كما البلّور واصفى من الماس=ما بينهن كوثر رحيقٍ و نرجيس
يشفي الظما عذب اللما فرد الاضراس=يكّات جيونٍ كنّهن ف يد قييّس
والصدر فيه نهود جعدٍ وجلاّس=ما صابهن مزّ الطفل والتلمّيس
والخصر خافج لقوة الفتر بقياس=عيصٍ على خشابٍ كما الطوق تلبيس
وردوف كما روس الاطعاس=وحياب ربدا سابجٍ خفّها الريس
يمشي دجر من سكرة الكيف لوداس=بارض المحل كان عشبت عقب تيبيس
باني قصر في مهجتي عالي الساس=عرشٍ تمكّن به كما عرش بلقيس
لاعب بقلبي مثل ما لعب دسّاس=شيطان قلبه يا ملا عيّز ابليس
كنّه نوى قتلي على غير تحساس=شروات ما لبنى جبر تلّفت قيس
والا كما تلّف كليب جساس=واصبح روايه في حكايا المراميس
ما همنّي دينّ ولا بي من افلاس=لكن بي خلٍّ لطيف التونّيس
حطّوا على بابه جنودٍ وحرّاس=متغلّسٍ دربه عليّه تغلّيس
يا الهاملي ضاع التفكّر ولقياس=بيس بحياتي يا الاخو ((ها)) السنه بيس
ضايع ومتبايع ولا شي نوماس=يا ونتّي ونّة ربيط المحابيس
أعزاك وانته يا الاخو مسند الراس=يا ذخرتي لا تشمت بيه لباليس
لنّي اعدّك للتماثيل كرياس=واتقيّس الدنيا بفكرك تقيّيس
عساك تسعدني على الهم والباس=لو بالكلام وبالمثل والتحمّيس
والختم صلى الله على سيّد الناس=باعداد ما هب الصبا والتنسنيس


قصيدة ( حي النبّا )
رد الشاعر : أحمد بن خليفه الهاملي

حي النّبا ومعرّب الجيل باطراس=م اللّي معدّي مزمله في المجاليس
حيّه عدد ما دنى و مابات نسناس=شرتا الصبا يوم الخلايا مناعيس
ياني وانا مرتاح قلبي م الاهواس=طربٍ تلقّيته أفكّ القراطيس
واقراه من قلبٍ على الردّ نوماس=واتلو سطور أبيات شعره بتأسيس
حتى عرفت امّا قصد جيله وداس=وما جاد به فن الذّكى من تلاميس
أشعر كما يشعر ولقياس بقياس=والكّل منّا ضايعٍ بالهواجيس
باقوم بالشكوى على العين بقياس=إلصاحبي سالم وببذل له الكيس
إن كان بك يا بوحمد م الدهر باس=آمر وحنّا لك فروخ وجرانيس
نّأدّي مطاليبك على كل كرياس=ما تكودنا دون الوفا لك مقاييس
عاداتنا نقلط ولا نرد بالياس=نوفي ونستوفي ولا نحاسب اللّيس
لكن عوقك يا فتى غامق الساس=تشكو صوابه من سنينٍ مداريس
وعادة لذي في الحب غايص وغطّاس=توضح دوافع مهجته بالمراسيس
معذر متحمّل هجر حلو الالعاس=راعي الذوايب فوق متنه مكاديس
بنزور داره فوق جيباتٍ بكاس=جدّد لوامع يذّبن م القراطيس
ويتقضي لازم على كل كرياس=إن سلّم الله بالنشاما مناحيس
كم اشتكيت وكم سجّلت الاطراس=ياذا وكم ناجيت بالجيل رمّيس
مترى الهوى ياتي على خطّة الياس=سالم وباب الحب مربوط بالحيس
لو ما الصبر مايوا على دروبه الناس=ولا اصبحوا مثلي ومثلك مفاليس
خلت الهنا في عشرة الحب والباس=والصوع حمّلني وكثر الهواجيس
ما دام لي فنّه على وجه وقياس=كل يوم يتبدّل كما لون طاووس
وانا أجامل واجهل الوضع بالساس=وآدش في فن الرجا بالتجنّيس
مرّة أنال ومرّه أيّي ورا الساس=صابر ولا اظهر صفرتي للجواسيس
والآن كانك تشتكي حط حرّاس=دونك وخلّ الوصل به بيس ما بيس
والا جعل لمباشرة وصلك أساس=تمشي على جدول طريق التهنديس
بينك و بينه عامل الوصل حسّاس=لونك بعيد وهو بعيد التجنّيس
خلّه كما خلاّك واعتاض به ناس=بيعه كما باعك بادنى المباخيس
والناس تتكافى من الناس باجناس=والله يعوّض زارع الرطل بالكيس
ولا تقتفي قومٍ تباريك لفلاس=منهم وتتمنى لهم قصر بلقيس
تّمت عدد ما هب م الياه نسناس=أو ما حدا الحادي وما دوّن العيس
على نبّيٍ شافع الخلق والناس=يوم الحساب ويوم النشر القراطيس