قصيدة ( واعذابي )
الشاعر: سالم محمد الجمري

واعذابي من صوابي يا ملا=من فراق صويحبٍ عندي ظنين
شط بي والقلب دونه ما سلى=جارحنّي في الحشا والجرح شين
هام قلبي في وداده وابتلى=مثل ما أيّوب بالبلوى محين
حاز منزل في حشايه واختلى=وافترد في منزله ماله ثنين
البدر من نور وجهه يخجلا=أدعج العينين وضّاح الجبين
واردٍ زلفه يشيل معشكلا=جانيٍ لونه على المضمر يلين
كل صبح وكل عصرٍ ينطلى=زعفران وعنبري مع ياسمين
والخشم سيفٍ مهنّد ينجلى=والثنايا كنّهن صفّن شرين
والمعنّق عنق ريمٍ في الفلا=أو مهاةٍ ترتعي روس الفنين
عينها عين الرشا لمجفّلا=أو كما حرٍّ يتوق الصيد وين
والصدر جنديل نوره يشعلا=صافيٍ كالصين والا كاللجين
جاعد النهدين والرف اعتلى=هايف الخصرين والعود اللدين
خذ فوادي وانهبه عنّي ولا=راف بي خلانيه مغرم حزين
إن تركت الحب صرت مهبّلا=وان تبعته قمت أسيع بالونين
صرت عن جمع الملا في معزلا=ضايعٍ متبايعٍ مالي عوين
ثيب يا مانع ترى الحال انحلا=وانت دختور المحبّه كن فطين
جيبني يا مشتكاي وقل هلا=ساعد اللي مستجير ويستعين
والف صلى الله على خير الملا=سيّد الكونين خير المرسلين


قصيدة ( مرحبا باللي )
رد الشاعر : الدكتور مانع سعيد العتيبه

مرحبا باللي لفانا ويا هلا=مرحبا باللّي عنانا يستعين
ويا هلا بالمستهام ومسهلا=عد أيام الدهر عد السنين
وعد مزنٍ من سحابه يهملا=وعد لي بالبيت طافو ملبّين
بك نرحب زد من دون الملا=من خواطرنا لكم مستقبلين
يا من الجمري كلامٍ به حلا=شاعرٍ معروف بين العارفين
يشتكي هجران خلّه وابتلى=من صوابه صابر علاجه محين
يسجع الونّات في روس العلا=هايمٍ من زود شوقه للضنين
إبشر أنّا لك بنفزع في الخلا=يا الخوي وبنكون لك مأيّدين
إن طلبت المال منّا بنبذلا=وان بغيت الحال نحنا حاضرين
ولي خليلك حال من دونه فلا=بانسير وياك صوبه طالبين
إنت طالب والمطالب ينتلا=ويبلغ المقصود لو من بعد حين
ما يلومك غير لي هو مغفّلا=ينحسب في اعداد قوم الجاهلين
إنت شرع لكل صب تمشكلا=قاضيٍ في الحب بين المغرمين
هيّض امّا بي كلامك لي تلى=كل مابي وخفت سدّى يستبين
أنا مثلك نار حبي تشعلا=من غرامٍ في حشا قلبي دفين
صاحبٍ خذني وقلبي ما سلى=عن هواه وصرت مرّه مستكين
بو جديلٍ فوق ردفه معشكلا=كالدجا وايغطّي العود اللدين
والعيان اعيان ريم مجفّلا=هايبٍ يختال زول القابضين
والرموش رماح منها مجندلا=والحواجب زاهياتٍ بالجبين
والخشم كالسيف لامع ينجلى=له حلاه تبين بين الزافنين
والخدود بروق مزن تهلّلا=والثنايا لولوٍ غالي ثمين
والنهود زمام فاعن للعلا=شلّن الجلباب شروى شوب تين
هايف الخصرين والردف اعتلى=بالتغريف لي مشى عوده يلين
كامل الأوصاف حسنه تكمّلا=لي شراته وين بانلقاه وين