قصيدة ( ورقٍ لعى )
الشاعر : سالم محمد الجمري

ورقٍ لعى ب صواته .. في غصونه .. أرّق نظير العين
آون من ونّاته .. ولحونه .. ونّة قلبٍ حزين
يتسقّى بأحسراته .. من بونه .. ما وقّف م الونين
هلّ الموق عبراته .. في حضونه .. على فراق الظنين
لي شطّه في حياته .. مظنونه .. فرد ولاله ثنين
بو جادلٍ طيّاته .. ع متونه .. يحفى منها الوتين
مقرنّه حيّاته .. وعيونه .. منها الوليع يحين
نور القمر شرواته .. من لونه .. في الخد وفي الجبين
والمبسم من حلاته .. ليمونه .. ينعش قلب الحزين
كنّه سكّر نباته .. معجونه .. يتبسّم عن شرين
لمع الصدر وصفاته .. نامونه .. شروى لمع اللجين
نهده على زمّاته .. زيتونه .. ما لامسها الجنين
معزّل من قطاته .. يطرونه .. قدّ الخصر فترين
تيّمني من بهاته .. وفنونه .. خلاّني مستهين
هات القلم ودواته .. قل عونه .. يا طارش يا فطين
بكتب سلام أبياته .. مدفونه .. عسره على الدلهين
خمسين من عيناته .. يفدونه .. ظبيٍ نفل بالزين
حرف اربعه منهاته .. يعنونه .. شلّه حيدٍ سمين
يا فاهم لاغطواته .. بأذهونه .. لا تفضي بالكنين
فسّر ورد عباته .. مضمونه .. عن خبره يستبين
خوفي من الشمّاته .. يفضونه .. للناس المغرضين
معطي عهد وثباته .. ماخونه .. ما دامنا حييّن
يا ربيّع وش حياته .. يرثونه .. لي شط به مسكين
يسج في سجّاته .. وشجونه .. بربيّع يستعين
عسن من شيماته .. وحنونه .. يتداركه في حين


قصيدة ( حي النظم )
رد الشاعر : ربيع بن ياقوت

حي النظم وابياته .. وفنونه .. ما داور الذنّين
وما قصف باصواته .. في مزونه .. رعدٍ سوّى حنين
واسهرني بونّاته .. وشجونه .. راعي القلب الحزين
ومسجّ في لجّاته .. من بونه .. العاشق المسكين
برثيه في منحاته .. ومن دونه .. بوقف جسرٍ حصين
والحر لي شرواته .. يرثونه .. وربيّع له عوين
لي يشتكي علاّته .. مدفونه .. له قلبٍ مستهين
يا سالم لي حياته .. مرهونه .. في ناسٍ مبعدين
غرٍّ هدّ ايدلاته .. ع متونه .. تضفي على الردفين
أغنج ذبّل شفاته .. معيونه .. ودوا القلب الشجين
هذا الهوى عاداته .. يطرونه .. وكلنا به مدمنين
نمشي تحت راياته .. ونصونه .. وندرى عهد الضنين
نعطي الصاحب وفاته .. ما نخونه .. ويبقى سدّه دفين
ونغط ف موياته .. في ونه .. يوم الملا هيعين
وربيع في صلاته .. يلهونه .. صاير من الدلهين
صغت النظم محلاته .. مضمونه .. شبه الدر الثمين
تمّت عدد منحاته .. ولحونه .. ما داور الذنّين