قصيدة ( يا بو خلف )
الشاعر : الشيخ محمد بن راشد آل مكتوم

يا بوخلف إن كان بتروم=حيدك فهيمٍ للمقالات
البارحه في غفلة النوم=يتنى روايا الحلم زينات
من سيف تيك اخبار وعلوم=كل يوم يرسل لك مقالات
يعزاك يبغي منك معلوم=لو بالسوال وبالمقالات
في الليل تتزايد به هموم=تلقاه ساري في الظلامات
خلاّه في دنياه محروم=هذي سبايب لبدوّيات
شواب والشّواب يا شوم=ما يظهرون بغير كشمات
وما ينقبض الشي بحلوم=وجروح سالم داخليّات
تميّت حاير دايم الدوم=بو باتسجّل في الاذاعات
الزين أقفى ولاله علوم=ما يفيد لو تدفع جنيّات
شروات لي جنعان ويحوم=ما ينقبض يا سلام ايهات
وباطرّشك في خط مرسوم=جدوى محمد ولد سوقات
من صاحبٍ له مرّث رسوم=ما يشوف منّه غير لحظات
يا ناس ع فرقاه ما اروم=خمس الثواني عشر ساعات
هذا ومن لاماه محروم=لي في ضميري حط ليعات
ومن صوب حامد تيني علوم=أمير فيهم في الإمارات
ماخوذ من بو نهد مزموم=راعي العيان الأدعجيّات
وطفٍ نجل والحشا مهضوم=مثل الخلوب الخدلجيات
راتع ويرعى بين لقروم=جريب يسكن في الإمارات
حتى حمد اليوم مهموم=وتطوف في راسه خيالات
ودّر صلاته وترّك الصوم=وخلاّه وقتٍ للعبادات
ياخذ شبه من ظبي لحزوم=ما هوب شورى اللندنيات
من لي رميهن كنّه سهوم=سود العيون الراشديات
وحميد فيهم دايم يهوم=تلفاه في ينب الحريمات
ماشي في الدنيا لك يدوم=ووقتٍ مضى لك روّح وفات
باقول هم سوّوا لك علوم=باندب جدا حبوش مقالات
يعرف ع الواجب وبيقوم=وفهيم في ردود المقالات
باطّرش الصاروخ لي يقوم=مضمون يقطع بك مسافات
سلام جدوى كل محشوم=لي يسكن قصورٍ عليّات
وسلام للي نش م النوم=ين ثار وعيونه غضيّات
وياما كسرنا جملة ريوم=أهدابهن سمرٍ مظّلات
وما يقول في دنياه محروم=لي ذاق من طعم اللشافات
والشي ذا أخبار وعلوم=والزين له في الصيد طيحات
لأنّه وصوله صار ملزوم=لي في جمال اليوسفّيات
لو حط لي جيشٍ بتقدوم=من دونهم والله ما بات
بازاوره في هيعة النوم=يوم الخلي غضّا وبيبات
طوطور عينه هوب محموم=لي بالكريب له سبع ليّات
وياكم قبله صار مبهوم=ويعد في خبر الدعايات
وإن كان يا حامد بك هموم=عزّي لحالك م البنيّات


قصيدة ( يا شيخنا )
الشاعر : سالم محمد الجمري

يا شيخنا يا ذرب لعلوم=يا ولد من يحمي الحميّات
يا ذخرنا لي بد ملزوم=يا مرّمس البيض الخوندات
ياني يوابٍ منك مفهوم=عجيب والفاظه غريبات
رحّبت به ترحيب مكروم=سبع وثمان وعشر مرّات
من عاداتي للواجب آقوم=وافسّر المعنى والأبيات
وادرى الخطا واللاش معدوم=بيني وبين أهل المروّات
يا سيّدي تكفى من اللوم=فضلك علينا له نجيّات
وانته معي غالي ومحشوم=يا ذخرتي في كل حالات
أنا معي للرد بلعوم=ما يعضلني رد المقالات
أجيب وافرح كل شغموم=ولي مثل تضرب به نعات
وإن قلت فن الشيب مذموم=سابج لكن له مراعات
عند العرب والناس له سوم=الشيب له قدر ومحلاّت
كم شايبٍ له راي وعزوم=يقطع بهن بعد المسافات
والشيب للإنسان محتوم=يا شيخ ماعنّه مطافات
وان كان سيف محارب النوم=ما يلام له في الفن عادات
ضاري يرّمس زين لوشوم=يذكر عصوره لوّليّات
يوم الهوى والسمت في جوم=الفن عنده قيّل وبات
ياما ركب في شد علكوم=ايماربه بين الكرّيات
قاد الضعن والهين زمزوم=والفرش ترفل بالقذيلات
والخود شروى ربد لحزوم=مربى الوطن هوب اجنبيّات
واليوم هذا صار مهموم=يشكي الحسايف والندامات
لان الهوى له فن مبهوم=ماشي له كيفٍ ولذّات
إلا شرى اللّي يقنص الحوم=لي ما لهن في القبض دورات
شتّان بين الحر والبوم=هندي وسندي وعجميّات
أخير هوانا عن هوى اليوم=حلو الطرب في ذيك الاوقات
وان كان قولي فيه مفهوم=إختص من حامد فهوّات
ينبيك وهو عنده علوم=عن الزمان اللّي مضى وفات
يا شيخنا يا قايد القوم=تكفى من احداث الملامات
أعيش به وانال مقسوم=عند الذي يثني بشوفات
واطري الهوى واحيي له رسوم=عن لا يقولون الهوى مات
منّي سلامٍ لك على الدوم=أهديه لك بأشرف تحيّات
آخنّ من مسكٍ ومشموم=وانوع عطور العنبريّات