يا حياة الروح يا روحي=يا صبي العين لمجادي
من ودادك زاد بي نوحي=هلّت دموعي على وسادي
ناحلٍ و الحلا مظروحي=من تصاويب العنا غادي
والمحبّه تلّفت روحي=واذبحتني ذبح جلاّدي
لنّ حبّك لاحج الصوحي=في الحشا و معذّب فوادي
وانت ما ترجع عن الشوحي=روف بي يا غض الانهادي
إسقني من مبسمك موحي=شربةٍ من عذب الاشهادي
والهوى له فن موضوحي=لو سمحت بوصلك مرادي
بتعتق لك روح مجروحي=محرضٍ ما بين الاشهادي
غرج ومسمّر على لوحي=عايشٍ لاما و لا زادي
تحتني يا وليّفي توحي=شطّني حبّك بلا جادي
يوم انا بالبعد منزوحي=عنك كيف التذ برقادي
يا عجيد اريامٍ سروحي=ليش ما توفي بالاوعادي
خل درب الوصل مسموحي=بيني و بينك يَ ودّادي
بأختلي بك روحك و روحي=رغم حسّادك و حسّادي
لا تظن انساك و آروحي=في فوادي حبّك يسادي
دامني حيّ لك جروحي=في ضمير القلب ترتادي
هايمٍ في الحب متروحي=وانت عنّي هوب نشّادي