يا ركب من فوق عجلاتٍ نفايل=العفايا اللّي لهن ماشي مثيله
النقايا الصيعريّات البزايل=العرابيّ الهجان المستطيله
الأذان مشذّرات كالنبايل=والغوارب والرقاب لهن طويله
فنّقن ما كدّّهن راعي حمايل=ما ولاهن واحدٍ عنده دبيله
قيّظن في ريف عن شمس القوايل=واصفرن في روضٍ مديمٍ ظليله
في مزارع جت يرعن م القلايل=يشربن وين الفلي سوّى دجيله
حايلاتٍ جافلاتٍ كالسلايل=يدعن مسير العشر يومٍ وليله
من غواهن شبه الامهار الاصايل=أو كما العجبان لي شافن فصيله
لي دون شروات عاصوف الشمايل=لو كما الاريام غزلان المسيله
ما عليهن غير منسوج الجمايل=ساحه وخريٍ وجاعد بو قذيله
والزهاب اللّي عليهن م الجلايل=دلّه ونجرٍ ومقلا والصميله
لي عليتوا فوقهن يا اهل الزمايل=وانتويتوا بالمشام وبالرحيله
إركبوهن واضبطوهن بالحبايل=واقرعوهن بالعصا عن كل عيله
أرفعوا روس النظا لي يا قبايل=قدر فنجالٍ يقنّد لي بهيله
لي افكّر وافتكر عن كل عايل=وانظر بيوت الشعر عن كل ميله
بأكتب لكم خط منهاج المثايل=واحملوه ان كان ما معكم عضيله
فيه تشريف المخوّه والرسايل=بلّغوه من الرفيج إلى زميله
غبّشوهن يكشحن نادي الطلايل=من دبي و سيروا مسير العجيله
سير كم لمغيب تكفون العلايل=كنّكم قصّاد لـ سودا نثيله
بالقرايا عن مزاميم الرمايل=واقطعوا سيح الشعيب بكل وسيله
والصدر خلّوه عنكم في الشمايل=خطّفوهن من جنوبي النصيله
مروّا الظنّه على اظهور الذلايل=واقصدوا دوحة قطر عقب المجيله
لي وصلتوا دار ذربين الفعايل=تلتقون بذيك لوجوه الفضيله
إنشدوا واتخبّروا عن قول قايل=وين بيت سعيد بدّاع المثيله
البديد الشاعر اللّي له دلايل=لي يرحّب يوم بيلاقي عميله
من نهي عنّا ونحنا في وشايل=نرتجيه ونصتصيخ ونستخيله
وش بداله م الأمور م العظايل؟= ما يعرّفنا بخطٍ فيه جيله
بلّغوه الخط تكفون العبايل=والتحيّه والسلامات الجزيله
عد ما سحبٍ تهلهل بالمخايل=أو عدد ما أعشبت أرضٍ محيله
واخبروه انّي بي جروحٍ دمايل=من مصاب الحب ويل القلب ويله
شاغبنّي حب منسوع الجدايل=أقرن الحيّات بوعينٍ ثليله
والشفايا رهاف حمرٍ كالذبايل=والثنايا كالبرد لي من مخيله
جاعد النهدين مسلوب العزايل=هايف الخصرين وردوفه ثجيله
لا بمتين ولا بدجيجٍ م الهزايل=قدّه الميّاس رابي في غتيله
ما رحمني بالوصل خذني دغايل=صابني في القلب برماحٍ سليله
جارحنّي في الحشا جرح النصايل=ذابحنّي متلفي م اقدرت حيله
يا الاخو عزّاك يا ذرب الخصايل=ثيبني عن لا تخلّيني جتيله
فيك ظنّي يا الاخو م يرد فايل=وانت لي يا مسندي زبن الدخيله
لن شعرك يا فتى عبّاب دايل=لو كما شط الفرات وشط نيله
والختم صلّوا على خير الرسايل=النبي الهاشمي راعي الفضيله