قصيدة ( يا ضيا نور الدجى )
الشاعر : سعيد الصوايه

يا ضيا نور الدجا البدري=يا حسين اللون والصوره
يا نسب الاشراف يالعذري=ف الملا مالك مثل جوره
ردف نابي واهضم الخصري=نافلٍ ع الخود في طوره
الجدل يطلى من العطري=كاسي المتنين بشعوره
والخشم كالصارم الخطري=والخدود الورد بزهوره
والثنايا جيون البحري= واللحواظ فيهن فتوره
كامل الآداب والستري=أسرة المقداد مشهوره
من سلالة مجدٍ وفخري=بالحسن وسلوك مستوره
غرنجي اللون هو خمري=يخجل الأنظار من نوره
يسبي العشّاق بالسحري=لحظ عينه هوب مكسوره
ما شكى من حالة العسري=في هنا والنفس مسروره
يا شفا المشتاق لو تدري=بالولع والشوق وكدوره
كان ما دوّشت لي فكري=بالعنا والصد ومروره
ثيبني يا سالم الجمري=انت عوق الحب دختوره
ريّس العرّاف مختبري=فاهم الأفنان من دوره
عن وصوله ماليه عذري=لو بصارم تلف وخطوره
حرز بآياتٍ من الفجري=عن صروف الوقت وقصوره
ألف صلّوا عد ما يسري=ناسمٍ يلفي من بروره
أو عدد من صلّوا الوتري=ع النبي لي بلّغ نذوره


قصيدة ( قم نديبي )
رد الشاعر : سالم محمد الجمري

قم نديبي جرّب المبري=الضمير اهتزّت فكوره
هات لي قرطاس مع حبري=بأكتب الأبيات مسطوره
بابدع الأمثال من صدري=يوم فكري هاجت شعوره
قمت اجيب الشعر بالشعري=رد للي وضّح الصوره
لي شكى لي من صدا الهجري=مولعٍ في حب غندوره
ضايعٍ متبايعٍ مزري=ناحلٍ جسمه شرى الزوره
دمعته فوق الوجن تجري=من مصابه يشكي حسوره
خصّني بالقول مستذري=يطلب الثيبه مع جبوره
ينتخي ويخاطب الجمري=يختبر ويقول وش شوره؟
مرحبا بكتابه البكري=لي رسل لي فيه منشوره
مرحبا به عد ما تجري=كورة العشّاق في الدوره
يا الأخو يا سعيد لو تدري=بالهوى والحب ومكوره
صاب قبلك غانم الزهري=وابتلى في حب عصفوره
وين قيس وناصر الجبري=وين بن لعبون ووطوره
ما سمعت بقصّة البصري=في جزاير واق مشهوره
والعذاري حبّهن يسري=في الحشا ويسوّي حروره
إن بغنّك لو ورا خدري=لو عليهن حصنٍ ب سوره
يوصلنّك بالوفا دغري=غزوة الخفرات مستوره
وان جفنّك مشكل الأمري=من جفاهن تضربك دوره
والذي تهواه له تشري=ما تبيعه بيع لخسوره
وانت خلّك يوم لك يطري=يا نديمي سر له وزوره
ابعد الحسّاد كن حذري=بالك تبيّن بمسروره
سير له يوم الدجا غتري=يوم ليلك مرخي ستوره
والصبر محمود للبشري=كم صبورٍ نال ماجوره
يا الأخو عقب العسر يسري=كاد خلّك تهيع سبوره
ويغزي لك غزوة البدري=لي على العدوان منصوره
تهتني به مدّة الدهري=لي وصفته لي شرى الحوره
خذ وصاتي وامتثل بأمري=لا تخالف يا الأخو شوره
والا انا منك ارتجي عذري=ذا مرامي لك ومقدوره